UEFA Euro 2020 qualifying belhchianna

Europe khawmualpui ramte tana inelna sang ber UEFA European Championship 2020 khel tur zawnna qualifying round chu naktuk zan aṭangin khelh ṭan a ni dawn.

Kum 60-na
European Championship hi kum 1960 khan ṭan a ni a, France-in inelna hmasa ber hi thlengin Soviet Union an champion. Hemi ṭum hian team pali Soviet Union, Yugoslavia, Czechoslovakia leh France chiah an tel.

Inelna hmasa pangaah hian team li chauh an tel chhunzawm a, kum 1980 aṭangin team pariat an tel ṭan. Kum 1996 aṭangin team 16-ah tih pun leh niin inelna hnuhnung ber kum 2016 aṭang khan team 24-ah tih pun chhoh leh a ni.

Germany leh Spain chu champion ngun ber an ni a, vawi thum ve ve an champion tawh. Anni bakah hian France-in nomawi vawi hnih an chawi tawh a, team dang pasarih Soviet Union, Italy, Czech Republic, Portugal, Netherlands, Denmark leh Greece ten vawi khat ṭheuh an chawi tawh bawk.

Khawpui 12
Kum 60-na tur a nih avangin inelna thlengtu zat pawh tih tam a ni a, ram 12 - Azerbaijan, Denmark, England, Germany, Hungary, Italy, Netherlands, Republic of Ireland, Romania, Russia, Scotland leh Spain-ah khelh a ni ang a, khawpui 12-ah inelna hi neih a ni ang.

England khawpui London chuan group stage, round of 16, semifinal pahnih leh final a thleng dawn a, ram 12 zingah an chang ṭha ber. Munich (Germany), Baku (Azerbaijan), Saint Petersburg (Russia) leh Rome (Italy) ten group stage bakah quarterfinal an thleng dawn.

A bak khawpui pasarih Copen-hagen (Denmark), Bucharest (Romania), Amsterdam (Netherlands), Dublin (Republic of Ireland), Bilbao (Spain), Budapest (Hungary) leh Glasgow (Scotland) ten group stage leh round of 16 an theng thung ang.

Qualifying round chu
Europe ram zingah hian politics vanga ram inhal an awm nual - Gibraltar leh Spain; Kosovo, Bosnia leh Herzegovina; Kosovo leh Serbia; Armenia leh Azerbaijan bakah Russia leh Ukraine te chu qualifier khel tur zawnnaah hian group khatah dah an ni lo.

Heng bakah hian ram vawt bik Belarus, Estonia, Faroe Islands, Finland, Iceland, Latvia, Lithuania, Norway, Russia leh Ukraine te chu group hran ṭheuhah dah an ni a. Qualifying round-naa zinna atana hun, tha leh sum sen a tlem nan ram awmna hla bik chu a remchan dan anga siam rem a ni bawk.

UEFA chuan nikum aṭangin friendly match aiah ram inelna thar Nations League a duang thar a, hemi mil hian seeded team hi siam a ni.

Tling tur 24
UEFA hnuaia ram 55 chu group 10-ah ṭhendarh an ni a, group khat aṭang hian team pahnih zelin final round an lut dawn. Team li dang hi playoff hmanga zawn tur a ni a, qualifying thlir tel loin Nations League-a an ranking hmangin zawn tur a ni.

Euro 2020-ah hian inelna thlengtu ram 12 bakah champion lai Portugal te hi an tling sa bik lo a, qualifying round hi an khel ve vek ang.

Playoff chu
UEFA Nations League-ah khan ram 55 chu League A, B, C leh D-ah ṭhen hran an ni a, hmun ruak pali hi league tinin pakhat zelin pakhat zelin an chang ang.

League A-ah Switzerland, Portugal, Netherlands leh England te chu an group hmahruaitu an nih avangin Euro qualifier-ah hian pahnihna an ni phak lo a nih pawhin khelh theihna kawng a la inhawng ang. Heng team pali zinga tute pawh hi an tling nghal a nih chuan an hnuaia mi ten playoff-ah hian an ai an awh ang.

League B-ah Bosnia and Herzegovina, Ukraine, Denmark leh Sweden; League C-ah Scotland, Norway, Serbia leh Finland; League D-ah Georgia, Macedonia, Kosovo leh Belarus te chu qualifier kaltlanga an tling lo a nih pawhin palyoff kaltlangin beisei an nei thei ang.