Germany thar fiahin an awm dawn

20th March, 2019

Joachim Low chuan thutlukna danglam tak siamin 'Germany team thar' din avangin 2014 World Cup champion team-a player pawimawh pathum Jerome Boateng, Mats Hummels leh Thomas Muller te chu koh a tum loh thu a tichiang. Zanin dar 1:30-ah hian Volkswagen Arena, Wolfsburg-ah Germany team thar hian Serbia nen friendly match an khel dawn.

Die Mannschaft hian kum 2018-ah chhuan tur an nei lo a, calendar kumah a vawi khat nan vawi ruk an chak lo. FIFA World Cup-ah group stage-ah tlain Nations League-ah League A aṭangin League B-ah an tla thla bawk. Hei vang hian Low hian thutlukna mak tak hi a siam a, fiahna tak tak tur erawh Pathianni zana Netherlands nen Amsterdam-a Euro Qualifier an khelh hunah a ni ang.

Germany Thar
Joachim Low hnuaia Germany tharah hian captain Manuel Neuer, Toni Kroos leh Matthias Ginter te chiah 2014 World Cup champion team a mi a ni tawh a. Kum 25 mi Borussia Monchengladbach defender Ginter erawh champion ṭuma squad tikimtu chauh a ni.

Germany coach Low chuan, "Euro 2020 qualifier aṭangin bul kan ṭan ṭhat a ngai a, nikuma kan result avangin loh theih loin thutlukna hi kan siam a ngai. Kan khelh dan turah pawh ngaihtuah nasa takin kan seng a, ball chan tam erawh kan thupui a ni zel ang. Manchester City leh Barcelona pawhin an la hlawhtlin pui thei a, chutihrualin awm ze neia ball chan tam leh rang zawka goal nawr kawngah hmasawn a ṭul," tiin team thar awm dan tur a sawi.

Mi thar
Germany tana koh zingah hian ram tana la khel miah lo pathum RB Leipzig defender Lukas Klostermann, Werder Bremen midfielder Maximilian Eggestein leh Hertha Berlin defender Niklas Stark te an awm.

Kum 22 mi Klostermann hi Rio Olympics-a Germany silver lak puitu zinga mi kha a ni a, a club khelhna Leipzig hian match 26-ah goal 20 chhuahin Bundesliga-ah tlarhnung phui ṭha ber an ni mek. Kum 22 mi Eggestein hi Ilkay Gundogan, Leon Goretzka leh Toni Kroos te avangin khelhna a chan mai a rinawm lo a, amaherawhchu player thahrui ngah bik a nih avangin Low-a'n a ko tel hi a mak lo.

Kum 23 mi Stark hi midfield aṭanga centre back-a insawn a ni a, Low-a'n a koh chhan nia lang chu ball sem a thiamna hi a ni a, tun season chhungin a pass 90% chu a dik.

Hmabak êng
Germany hian ram tana la khel tam lo beiseiawm tak tak a nei nual a; Bayer Leverkusen midfielder Kai Havertz (2 caps) chu kum 19 mi chauh ni chungin Bundesliga match 79 a khel tawh.

Kavertz-a khelhpui Jonathan Tah pawh koh chhunzawm a ni a, kum 23 mi hi Euro 2016 squad-ah khan a tel a, amaherawhchu ram tan vawi li chiah a la inlan. PSG defender Thilo Kehrer pawh vawi li tho ram tan a inlan tawh a, centre back-ah chhawr thei ni mah se a tlan chakna avangin mual sir lama dah theih a ni a, kum 22 mi chauh ni chungin French champion tan hmun pawimawh a chang pha.

Bayern Munich winger Serge Gnabry pawhin hma a sawn zel a, German champion tan chauh ni loin ram tan hmun pawimawh a chan beisei a ni a. World Cup-a koh loh Leroy Sane erawh kum 23 chauh ni mah se tlarhmaa hming lansar a ni tawh dawn a, amah aia kum khat chauha upa Bayern midfielder Leon Goretzka leh Bayern defender kum 23 mi Niklas Sule (6ft 5in) te nen an kum phu loin tawnhriat an nei ṭha tawh.

Joachim Low hian Muller, Hummels leh Boateng te ko lo tura thutlukna siam turin player dang koh tur a nei ṭha a, thutlukna huaisen hian rah ṭha a thlen a nih pawhin a thutlukna siam dan hriatthiam lo erawh an awm mi ṭhahnem tak an awm ang.

Germany Squad

Goalkeeeper : Manuel Neuer, Marc-Andre ter Stegen, Kevin Trapp

Defender : Matthias Ginter, Lukas Klostermann, Niklas Stark, Marcel Halstenberg, Antonio Rudiger, Niklas Sule, Thilo Kehrer, Nico Schulz, Jonathan Tah

Midfield/Forward : Julian Brandt, Leon Goretzka, Joshua Kimmich, Leroy Sane, Maximilian Eggestein, Ilkay Gundogan, Toni Kroos, Timo Werner, Serge Gnabry, Kai Havertz, Marco Reus