MBA Official & Inter Dist C'ship

Nimin khan 34th MBA Official & 18th Inter District Team Championship chu Ramhlun Indoor Stadium-ah khelh ṭan a ni a, Mizoram Badminton Association hnuaia inelna ngaihhlut ber zinga mi a ni.

MBA Official-ah hian inelna hi category 19-ah ṭhenhran a ni dawn a, badminton thiam ber zawnna singles inelna chu ngaihven hlawh zinga mi a ni a. Men's singles-ah Samuel Lalnunmawia chu seeded number 1 niin tawnhriat nei ṭha Lalmuanawma chu seeded number 2 a ni.

Womens singles-ah Samuel-a nau Lalrinzuali chu seeded number 1 a ni a, F. Vanlalhriatpuii chu seeded number 2 niin an pahnih hian an bye avangin semifinal an lut nghal. Mizo nawlpui khelh tam doubles-ah R. Lalduhawma (Lalmama) leh Abel Lalnunsanga te chu seeded number 1 an ni a, Joseph M. Lalrinawma leh Zarzokima te chu seeded number 2 an ni thung.

Inter District Team C'ship-ah hian Chhinga Veng BC chu category pariat khel turin an tling a, champion tura rinkai ber an ni. Anni bakah hian ITI BC (5), Chanmari West BC (4), Mizoram Police BC (4) leh Mission Veng Badminton Academy (4) te chu CVBC el pha tur an ni ang.