Liverpool-in an thutlukna an sut, ngaihdam an dil!
Premier League hmahruaitu Liverpool chuan non-playing staff-ten hlawh an lak zel theihna tur atana sorkar scheme behchhan an tum chu an ṭhulh a, an fan-te hnenah ngaihdam an dil zui.
UK sorkar hnuaiah coronavirus hri leng vanga hnathawhnaa hlawh lama harsatna tawkte tana an hlawh 80% chin lak theih dan scheme a awm a, hei hi Liverpool chuan hmang ve turin thutlukna an siam.
Reds chuan hlawh 80% bak hi an tum ang a, hei hi an staff-ten an hlawh 100% an lak theihna tur atana an tih a ni - mahse Merseyside club-in scheme zawm an tum hi sumdawnna tenau zawk ten an hman tura ruahman a ni a, nikuma pound maktaduai 42 hleptu club chet dan hian dem a hlawh hle.
Premier League club zingah Newcastle United, Tottenham Hotspur, Bournemouth leh Norwich City-te chuan he scheme hi an lo hmang tawh a, Liverpool player hlui Jamie Carragher leh Stan Collymore-te chuan an lo khelh tawh ṭhianna club chet dan hi na takin an dem.
Mahse, hetiang taka sawiselna karah Liverpool-in fing takin an thutlukna an sut a, club chief executive Peter Moore chuan, "Kan thu chhuak hmasa zawkah khan thutlukna kan siam sual tih kan pawm a, a pawi kan ti takzet a ni," a ti.
Fan-te sawiselna nasa tak avang hian Reds club neitu Fenway Sports Group, Liverpool-a share nei te leh club thuneitute chu an ṭhukhawm a, thutlukna thar hi an siam ta a ni.
Moore chuan, "He hun harsa kan tawh hma khan kan sum dinhmun a ṭha em em a, mahse tunah chuan sum lut awm loin pekchhuah ringawt buaipui a ngai ta si a ni. Mahse, chutiang karah pawh chuan theihtawp kan chhuah zel dawn a, harsatna awm lo turin hma kan la dawn a ni," a ti a, an staff-ten hlawh 100% an lak ngei theih nan theihtawp an chhuah thu a sawi.