Football buaina thlentu Super League

Europe club lian inhlawm khawmin Pathianni zan khan European Super League (ESL) awm tur thu an puang a, club lian 12 - AC Milan, Arsenal, Atletico Madrid, Chelsea, Barcelona, Inter Milan, Juventus, Liverpool, Manchester City, Manchester United, Real Madrid leh Tottenham te hming a rik avangin a nghawng a lian a, boruak a sosang nghal hle.

ESL chuan inelna hi kar laihawl (mid week) a khelh tur a ni thu an puang a, club-te hi anmahni league-ah ṭheuh an tel tur thu an sawi tel bawk. Season hmasa ber hi hun remchang hmasa berah ṭan tur a ni a, club 12 awmsa bakah hian club dang pathum an awm belh leh ang.

Nimin tlai khan Borussia Dortmund CEO Hans-Joachim Watzke leh FC Porto president Pinto da Costa te chuan ESL hi an zawm loh tur thu an puang.

A nghawng chu
European Super League hi an khel ṭan tak tak a nih chuan Champions League a luahlan dawn. Premier League club lian parukin ESL an khel a nih chuan English club aṭanga UCL khel tur chu Leicester City, West Ham, Everton leh club tenau dang kha an ni dawn a, vawi leh khatah a hlutna nasa takin a tlahniam ang.

Premier League ti ngaih-nawmtu ber pakhat Champions League khelh tuma season tawp thlenga theihtawp an chhuah ṭhin kha a awm dawn tawh lo a, club lian leh te thliar hranin an awm ang. English football ang tho hian La Liga leh Serie A-ah pawh ESL nghawng hi a lian dawn.

An pawmpui lo
European Super League a awm tur thu an puan hnu lawkah FIFA leh UEFA ten an pawm loh thu an puang ve nghal. Football ngainatute tam takin ESL-a inchhung lut club-te hian sum vang liau liuain thutlukna an siamah an ngai a, domestic league leh infiamna hmanga inpumkhatna a tih chhiat tur thu an sawi nasa hle.

Football thuneitu sang ber FIFA chuan thuchhuah siamin, "FIFA chuan inpumkhatna a ngai pawimawh a, Super League-a inrawlh zawng zawngte football tana ṭha tura inbiakna awm ngei turin a ngen. FIFA chuan mi tlemte hlawkpuina tura duan European League hi a pawm lo. Football tana ṭha ber turin a ṭul angin hma kan la ang," a ti.

UEFA chuan, "Super League-a tel club te hi tualchhung inelna, Europe leh International level-a inelnaa tel thei lo turin hrem an ni ang. Player-te pawh ram tana khel thei tura tih an ni ang," tiin thuchhuah an siam ve nghal.

Hemi awmzia chu English club parukte hi an tel lui a nih chuan Premier League leh Europe inelna UCL leh Europa League-ah an tel thei dawn lo. Hei chauh ni loin heng club-a khel player-te hian European Championship leh World Cup an khel thei dawn lo tihna a ni.

FIFA leh UEFA hi English Football Association, Premier League, Royal Spanish Football Federation (RFEF), La Liga, Italian Football Federation (FIGC) leh Lega Serie A te chuan an thlawp tlat bawk.

Eng nge an sawi?
Real Madrid president Florentino Perez chu ESL chairman hmasa ber tur a ni a, Perez chuan, "Football hi khawvel pum ngainat a ni a, football ngaina mi tluklehdingawn li vel an awm a, an duhthusam phuhruk hi kan duh a ni," tiin a sawi.

Juventus chairman Andrea Agnelli chuan ESL-a tel a duh avangin UEFA executive committee leh European Club Association (ECA) chairman a nihna aṭangin a bang. ESL vice chairman Agnelli chuan, "Club 12 te hi hun pawimawh takah Europe inelna ṭha zawk din turin kan intel khawm. Kan hmangaih football kal zel theihna turin hma kan la a ni," tiin a insawifiah.

Manchester United co-chairman Joel Glazer pawhin vice chairman hna a chelh dawn. Glazer chuan, "Europe-a club ṭha ber leh player ṭha ber season khat chhung tawp kan dah khawm dawn a ni a, European football tan rahbi thar a ni dawn. Inelna ṭha zawk leh ropui zawk kan chhawp theih phah ang," tiin a sawi ve bawk.

European Super League-a tel club-ten insawifiah ve bawk mah se ESL hian khawvel hmun hrang hrang aṭangin dem a hlawh a, hetia sawiselna kara an kal zel dan tur hi mipui hriat châk a ni ang.