European Super League : Eng nge thleng?
Pathianni zan khan Europe club lian 12-ten European Super League awm tur thu an puang. League dintu club-te hi thuneitu an ni ang a, inelna hi kar laihawl (mid-week) a neih ṭhin tura ruahman niin Champions League elpui tur a ni ang.
Tute nge tel?
Premier League club paruk Manchester United, Manchester City, Liverpool, Arsenal, Chelsea leh Tottenham te an tel vek. English club bakah hian Spanish club lian pathum Real Madrid, Barcelona leh Atletico Madrid bakah Italian club lian pathum Juventus, AC Milan leh Inter Milan te an tel.
Inelna hi remchang hmasa bera ṭan tum a ni a, inelna ṭan hma hian club lian pathum tel leh tura sawi an ni. Tun dinhmunah German club lian pahnih Bayern Munich leh Borussia Dortmund bakah French champion Paris St-Germain te an la tel lo. Nimin khan Dortmund leh Porto ten ESL an zawm dawn lo tih an puang. Club dang pathum zinga pahnih hi Bayern leh RB Leipzig te an nih a rinawm.
Eng vangin nge league thar an duh?
League thar din tumtu club-te chuan Super League an din chhanah hrileng Covid-19 an puh. Coronavirus vangin football club-te sum lakluh a mumal lo a, sum dinhmun ngelnghet a awm theih nan sum tamna tur league hi an siam.
Chutihrualin Europe club ṭhate hian kum tam tak chhung tun hun thleng tur hian anmahni puala inelna awm theih dan tur an ngaihtuah tawh. Club lian leh player langsar hmanga sum tam zawk chawk luh dan tur an zawng a ni ber.
Eng nge inelna kalphung?
Super League kalphung tur chu a hnuaia tarlan ang hi a ni. Super League hi Europe club 20-te inelna tur a ni. Inelnaah hian league dintu club 15 bakah kum tinin qualifying paltlang club panga an tel ang.
Inelna hi August aṭanga ṭan ṭhin a ni ang a, group stage-ah club 20 te chu group pahnihah 10 ve ve in an awm ang a, home leh away-in an inkhel ang.
Heta ṭang hian a ti ṭha pathum ve ve chuan quarterfinal an lut nghal ang. Hmunruak pahnih hi group pahniha 4-na leh 5-na ve ve ten playoff (double leg) hmangin an zawng ang. Quarterfinal aṭang hi chuan Champions League kalphung pangngai angin home leh away hmangin chak zawk zawn a ni ang a, final hi neutral venue-ah single leg-a khelh a ni ang.
Inelna hi kar laihawlah khelh a ni ang a, club ho hi anmahni league-ah ṭheuh an awm ang.
Relegate theih em?
Zawhna awm nghal chu a relegate theih em tih hi a ni a, inelna dintu club 15 te hi chu tel tur chiang an ni. Club dang panga erawh an chet ṭhat dan a zira telh tur an ni a, club lian tawh sa tan chuan ham ṭhatna hlir tihin a sawi theih.
Khawi aṭangin sum?
Super League atan hian American bank JP Morgan aṭangin dollar tluklehdingawn 5 a awm thei dawn. Inelna a awm dawn tih an puan rual hian club tinin an hmunhma chei ṭhat leh Covid-19 vanga a sum tlachhe tur ven nan euro tluklehdingawn 3.5 an dawng ang.