Mourinho an ban leh ta

Tottenham Hotspur-in League Cup final khelh nan kar khat pawh tling tawh loah an manager Jose Mourinho an ban thu an puang. Portuguese manager hian a kalna apiangah a nomawi a chawi ṭhin a, Spurs erawh nomawi a chawipui dawn ta lo.

Spurs hian Mauricio Pochettino thlak nan November 20, 2019 khan Mourinho hi an lalut a, beiseina sang tak nen thlir mah se player leh fan nena inkarah buaina a tam avangin thla 17 hnu lekah an ban. Mourinho bakah hian coaching staff - Joao Sacramento, Nuno Santos, Carlos Lalin leh Giovanni Cerra te an ban tel bawk.

Khawvel manager ropui ber zinga mi Mourinho hian hlawhtlinna tam tham tak chang tawh mah se tun hnaiah erawh ban a tawk zing malh malh ta hle. December 17, 2015 khan Chelsea-in ban a, December 18, 2018-ah Manchester United-in an ban leh a, nimin khan Spurs in an ban a, kum thum danah ban a tawk tihna a ni.

Mourinho hian Spurs a enkawl hmasak ber season-ah parukna a nihpui a, Europa League khel tura an tlin avangin season tawpna inkhela Crystal Palace nen 1-1 an inhnehtawk ṭumin a lawm chiam. Portuguese manager hian London club hi nomawi chawipui ngei a tum a, tun season ṭantirhah pawh Harry Kane leh Son Heung-min te ho nen bul ṭan ṭhain pakhatna dinhmun luah lai pawh an nei.

Amaherawhchu nikum December thla laihawl aṭang khan Spurs hian chet ṭhat aiin chetsual an ngah zawk a, league-ah pawh pasarihnaah awmin Champions League khelh a beiseiawm tawh lo hle. Tun season-ah league match 10 a chak tawh lo a, season khata a chak lo tam ber ṭum a ni.

Inelna dangah pawh beisei an pha lo a, Europa League-ah last 16-ah Dinamo Zagreb lakah an goal hnih neih hum zo loin 3-2 in an inlehthaltir a, FA Cup-ah pawh fifth round-ah Everton hneh loin an tla bawk. Spurs a enkawl hnuhnun berah pawh Everton an hmachhawn a, 2-2 in an inhnehtawk.

Amaherawhchu Mourinho hote hian League Cup final an thleng a, April 25, Pathianni hian Manchester City nen nomawi an inchuh dawn. Pep Guardiola leh Mourinho inhmachhawn tur hian ngaihven hlawh mah se Spurs thuneituten an nghak thleng thei tawh lo.

Mourinho-a'n player-te a sawisel fo hi an hrethiam lo a, mipuiin an manager chungah rinna an nghat ngam tawh lo. Club thuneitute hian entu awm theih huna fan-ten Mourinho duh lohna an lantir tur chu hmu lawkah an inngai a, thutlukna hi an siam ta a ni.

Spurs hi an player hlui kum 29 mi Ryan Mason leh Chris Powell ten season tawp thleng a enkawl dawn. England international hlui Mason hi inhliam vangin football a chawlh hma a, April 2018 khan Spurs coaching staff hi a zawm tawh. Spurs hian June thla aṭanga a ngheta club enkawl tur hi an zawng ṭan tawh a ni.