Arsenal leh Fulham inhnehtawk

Pathianni zan Premier League inkhelah Arsenal chu an mikhual Fulham nen 1-1 in an inhnehtawk. Gunners hian injury time minute sarihnaah substitute Eddie Nketiah hmangin si phurh a sut hram.

Emirates Stadium-a inkhelah Dani Ceballos goal chu VAR hmanga hnawl a ni a, second half minute 59-naah Fulham lamin Josh Maja-a penalty hmangin hma an hruai, hun tawp dawn thlengin an hum thei.

Hliam vangin Alexandre Lacazette lak chhuah a ngai, a hmun ruakah Nketiah a lo lut. English striker hian point khat hlawh chhuahna goal a khung a, a goal luh hma hian Rob Holding chu offside nia a lan avangin Fulham lam an lawm lo hle.

Chak lo Fulham hian point 27 chauh an la hmu a, inhamtang tur chuan an hna a hautak tawh dawn. Mikel Arteta naute pawhin point 46 chauh an la neih avangin pakuana dinhmun an luah - season thara European football beiseina a sang lo.