Tsitsipas hun a thleng ta

Rafael Nadal leh Novak Djokovic inlan mah se a tawp a thiam ber chu Stefanos Tsitsipas a ni. Greek tlangval hian Andrey Rublev hnehin Monte Carlo Masters nomawi a chawi a, inelna ngaihhlut Masters 1000 title a lak hmasak ber ṭum a tawng.

Pathianni zan final inkhel hmuhnawm takah world number 5 Tsitsipas hian 6-3, 6-3 in hnehna a chang a, Russian tlangval laka chak tur hian darkar khet leh minute 11 bak hun a mamawh lo.

Inlena neih chhung zawngin Tsitsipas-a'n set a hloh miah lo, amah el phak an awm lo tihna a ni. Tsitsipas chuan, "Chawlh kar nuam leh hlimawm chu a ni chiang mai, ka tennis zinkawngah chuan ka tana kar ṭha ber a ni hial ang," a ti.

Kum 22 mi Tsitsipas hian 2019 khan a thiam zual pariat inelna ATP Finals-ah hlawhtlinna a chang a, a hnu lamah nomawi lian tham a chawi leh mai lo, tun ṭuma hlawhtlinna a chan avang hian clay court season an hman tur atan beisei a nei sang zual ang.