Hamilton hmaah Verstappen a thleng

Lewis Hamilton a champion leh ang, a tih ngawt theih ta lo. Emilia Romagna Grand Prix-ah Max Verstappen-a'n hnehna a chang a, a hnunga thleng Hamilton nen hian season hmasa aia nasa zawkin world title an inchuh ngei a rinawm.

Pathianni zan inthlan-siakah a tir lamah ruah a sur a, tlangkawng a huh avangin driver an fimkhur hlawm hle. A hmasa ber (pole) aṭanga bul ṭantu Hamilton hi kawng kawi hmaaa berah pathumna aṭanga tlan ṭan Max hian a rawn tlan pel, driver ṭha pahnih inum a hmuhnawm chhunzawm takzet.

Red Bull driver Verstap-pen a chesual duh lo a, nghet taka hma hruai zelin car intlansiakna sang berah a vawi 11 nan hnehna a chang. Dutch tlangval chuan, "Boruak awmdan a danglam a, hetiang tlan kawng hriat thiam harsa taka hnehna chan hi a hlu," a ti.

Tun season F1 intlansiak vawi hnih awm tawhah Hamilton leh Verstappen ten vawi khat ve ve hnehna an chang a, hnehna an chan loh ṭumin pahnihna dinhmun an luah thung. May 2, Pathianni hian Portuguese Grand Prix an tlan leh ang.