Marquez lo kir niah Quartararo a chak

MotoGP huangah Marc Marquez a lo kir leh thei ta a, hnehna chang nghal lo mah se Repsol Honda tan chanchin ṭha a ni. Pathianni zana tlan Portuguese Grand Prix-ah Fabio Quartararo chu a tlan chak ber.

Yamaha rider Quartararo hnungah hian Italian tlangval Francesco Bagnaia thlengin, world champion Joan Mir chu pathumna a ni thung. Beisei awm taka inelna hmachhawntu Johann Zarco erawh a tlan tluan ve thei lo a ni.

Doha Grand Prix-a hnehna chang tawhtu Quartararo hian a hmasa ber aṭangin bul a ṭan a, mahse a tir lamah a che fuh lo - palinaah a tlahniam hman. Mahse, lap 17 tlan tur la awmah hma a hruai let thei a, a tawp thlengin a talbuai tawh lo.

Nikum July thla khan Spanish Grand Prix-ah Marquez a inhliam a, a ban ruh zai niin thla kua zet a chawl. World champion vawi ruk ni tawh hi a lo kir lehna hmasa berah hian pasarihna dinhmun a luah a, atan bul ṭan thar lehna ṭha tak a ni.

Kum 28 mi Marquez chuan, "Tun hun ang hi ka suangtuahna a rei tawh hle. MotoGP huanga kir leh theih hi ka thil nghahhlelh leh chak ber a ni a, chu duhthusam chu a takin a rawn thleng ta," a ti. Harsatna nei loa a tlan zel thei a nih chuan rider dang tan el tham a tling leh ang.