FC Goa tan fiahna hautak

AFC Champions League match hnihah a zawna an tlawm loh hnuin FC Goa chu zanin dar 10:30 hian an inlan ve leh dawn ta a, group E-a team tawh khirh bera ngaih Perspolis nen an inkhel dawn.

Goan club hian Al-Rayyan leh Al Wahda chu rin loh takin an lo inhnehtawkpui tawh a, an phur hle - mahse, he team pahnih hneh ve ve tawhtu chu Perspolis an ni a, zanin an inkhel hi a awlsam dawn lo.

Iranian club ṭha hian group E an elpui dangte ang lo takin coach atan an ram mi Yahya Golmohammadi an hmang a, Iran international hlui enkawlna hnuaiah ram pawn player pawh an tam lo hle - chutihrual chuan an player zingah Iran tana regular taka inlan thei an awm nual avangin team hmuhnawm an ni.

Persepolis hian season hmasa khan AFC Champions League final an lut a, he inelnaa a vawi khat nana inlan FC Goa-te nen chuan tawnhriat an inneih ṭhat hleih deuh.

FC Goa chu ṭum dang ang thoin 4-1-4-1 formation chu an innghahna tur a nih leh a rinawm a, counter attacking football hmanga Iranian club hi hrem an duh dawn a nih chuan tlarhmaah Jorge Ortiz leh Ishan Pandita-te an hriam a ngai dawn.

Captain Edu Bedia chu innghahna ber a ni leh ang a, defensive midfield-ah dingin tlarhnung leh tlarhma thlun zawmtu pawimawh a ni leh ang - keeper Dheeraj Singh bawk hi a khelh ṭhat leh a ngai dawn a, Manipur keeper hi a chet ṭhat phawt chuan a team clean sheet pui thei tur khawpin a ṭha tawk.

Perspolis hian inkhel tura India an rawn pan hmain social media lamah, "Kum 283 liam taa Iranian sipaiten India an lak hnua a vawi khat nan kan kir a ngai leh ta..." tiin India leh Iran lo indo tawhna an tarlang a, hei hian Indian mipui tam tak lung a ti awi lo hle.

India rama football thuneitu sang ber All India Football Federation (AIFF) phei chuan Asian Football Confederation lamah Perspolis hi a hek hial a, Iranian club hian AFC Disciplinary and Ethics Code-a Article 50 leh 58-a bawhchhiat thu an tarlang - zaninah inkhel a 'hot' loh ring suh.