FA Cup Arteta enkawl Arsenal an tlang

Chawlhlawk laiin Arsenal manager Mikel Arteta-a'n a naute hnenah eng nge a sawi hriat a ni lo a, inkhel chawhnu lama a naute khelh danah erawh thu awmze nei a sawi tih a chiang. Gunners hian an mikhual Leeds United 1-0 a hnehin FA Cup fourth round an lut.

Thawhṭanni zan Emirates Stadium-a inkhelah Leeds lamin hun chanve hmalam an thunun, goal khung tumin vawi 15 ngawt hun an insiam thei - striker Patrick Bamford chuan bar tih per dawpin an mualah Arsenal an him hram.

Second half erawh Arteta naute lam chan a ni ve thung. Ball an chang hnem a, rang tak taka inpe kualin hun ṭha an insiam, inkhel an thunun rah sengin rawlthar Reiss Nelson chuan minute 55-naah chakna leh goal awmchhun ni bawk a khung.

Inkhelh banah Arsenal keeper Emiliano Martinez chuan, "A thinrim takzet," tiin an manager chungchang a sawi. Striker Alexandre Lacazette pawhin, "A ang nasa hle, a sawi anga kan khelh loh avang khan a lungawi lo a ni," tiin hun chanve hma lam an hman dan a sawi.

Gunners manager Arteta chuan, "Hun hmasa minute 30 hnu lam leh a hnu lama inkhel kha chu team dang daih kan ni, a tawpah hnehna kan chan avangin ka lawm takzet. Rilru put hmang kan thlak a, ṭha taka kan thawk ho thei khan chakna min pe. "A chang chuan kan inkhel hi eng anga harsa leh chik ngai nge tih kan hriat thiam a ngai. Leeds inkhel kha ka en fo a, team ṭha leh intelkhawm ṭha an ni tih pawh ka hria, match hautak khelh dan pawh an hre hle," tiin Championship hmahruaitu club a fak.

Mikel Arteta-a'n a naute rilru hnual tawh tak chawh thawh a ngai tih a chiang a, eng inelna pawh ni se hnehna chan a duh. Gunners captain hlui chuan, "Kan ngai pawimawh, hnehna chan hi ngaia neih kan tum ang," tiin a sawi.

Leeds lakah pawh a player neih ṭhat a chhawp chhuak, captain Pierre-Emerick Aubameyang chu hahchawlhna hun pek ni mah se tlarhmaah Lacazette a awm. Playermaker Mesut Ozil leh player manto ber Nicolas Pepe te chuan inkhel bul an ṭan bawk.

FA Cup vawi 13 champion tawh hian first half-ah 37.2% chiah ball possession an nei a, goal zawnah vawi khat chiah an pet. Second half-ah an khelh ṭhat avangin inkhel pumpuiah ball 42% an chang phak a, goal khung tuma vawi 16 petin vawi khat chu a hlawhtling.

FA Cup fouth round draw neih nghal a ni a, January 24 leh 27 hian khelh leh a ni ang. Leeds hnehtu Arsenal hian Premier League club ve tho Bournemouth chu khualmualah an hmachhawn ang.

Unai Emery thlaktu Arteta-a'n North London club a enkawlna hmasa berah khan Bournemouth nen inhmachhawnin 1-1 in an inhnehtawk, an intawn vawi hnihnaah erawh inhnehtawk a awm thei tawh dawn lo. Champion lai Manchester City chuan Fulham an hmachhawn dawn a, Premier League hmahruai mektu Liverpool chu Championship club Bristol City leh League One club Shrewsbury inkhela chak zawn nen an inkhelh dawn avangin tlang tura ngaih an ni.