Atletico tan nomawi beiseina a la bo lo
Tun hnaia an result avangin Atletico Madrid dinhmun derthawng hman mah se Pathianni La Liga result-in Diego Simeone-a naute tan result duhawm a herchhuahpui leh ta.
Atletico Madrid hian Pathianni zan khan an mikhual Eibar chu 5-0 ngawtin an sawp a, Angel Correa leh Marcos Llorente-ten goal hnih ve ve khungin Yannick Carrasco chuan goal khat a khung bawk. Real-in Atletico chak thu hre sain Getafe an lenchilh a, an nomawi beiseina chhi nung turin chak an mamawh tih an hria - mahse, khualmualah goal an khung thei lo a, 0-0 in an ṭin.
Zinedine Zidane-a nauten hnehna an chan zawh loh avangin hmahruaitu Atletico nena an inthlauhna chu point thum a ni leh ta a, Copa del Rey final an khelh avangin pathumna Barcelona erawh kartawp La Liga-ah an inlan lo thung.
Inhrosa
Atletico Madrid-in an league match hnuhnung pahnihah hnehna an chang zo lo a, Sevilla (1-0) laka an tlawm hnuin Real Betis (1-1) chu khualmualah an inhnehtawkpui.
January thlatira La Liga-a point 10 vela sang fal hman Atletico dinhmun a nghing a, tun season-a La Liga nomawi bak beisei tur nei lo team hian kut ruakin season an khar mai dawn niin a lang hman. Pathianni zana an mikhual Eibar hi La Liga mawngphah ni mah se fan-ten Atletico chungah rinna nghah ngam an harsat a, an thiampuipa Luis Suarez leh Joao Felix-te chu hliam vangin an la inlan thei lo zui.
Mahse, Atletico ngaihdan a dang thung a, an thawnthu thlak danglam an duh tawh - goal khung lawk lo mah se Correa chuan minute 42-na leh 44-naah goal a rawn khung a, 2-0 in chawlhlawk an hmang.
A la tawk lo
Mahni mualah, Eibar lakah Atletico-in 2-0 in hma an hruai a, chak tur a chiang tawh angah ngaih a ni - mahse, Simeone naute hian goal hnih leka lungawi an la tum mai lo.
Second half ṭan aṭanga minute lina lekah Carrasco hun a inher chhuak ve thung a, Correa goal hnihna siamsaktu hian Eibar 'offside trap' a bum hnuah an goal thumna a khung. Madrid khaw club tan Llorente hun a her chhuak a, Betis an inhnehtawkpui ṭuma hliam vanga inlan thei lo hian goal hnih a rawn khung a, 5-0 in a team a chakpui.
Atletico coach Diego Simeone chuan, "Hnehna chan chuan engkim hi a awlsam a, rilru a hahdam ṭhin. Hma kan sawn zel theih ka beisei a, Real leh Barca chiah champion theihna hmun ang maia he inelna hi chhuah loh kan tum a ni," a ti a, midangte tana beiseina siamtu nih a duh.
Madrid an chelh
Barcelona leh Liverpool hneh hlim Real Madrid-in an chet ṭhat an chhunzawm thei lo a, khualmualah an hneh tur saa ngaih Getafe chu 0-0 in an inhnehtawkpui thei hram.
Lehkha aṭanga en mai chuan Real Madrid hi chak phu zawk anga ngaih theih an ni a, mahse, Getafe ngaihdan a dang - scoreline chauh en tan Getafe hi vannei anga ngaih theih a ni bawk a, mahse, an vanduai zawk! Getafe hian vawi 19 ngawt shot an nei thei a, heng zinga paruuk chu target-ah a kal - Real tan keeper Thibaut Courtois awm lo se chak loh theihna a ni a, Belgian keeper zarah point an hlawh chhuak hram.
Courtois hian hnai tak aṭanga Mathias Olivera 'shot' chu a dansak a, Nemanja Maksimovic khung ngei tur nia lang chu a dang bawk - Real tan Vinicius Junior chuan hun ṭha nei ve bawk mah se Madrid khaw club hian a nihna takah chuan point khat pawh an phu lo.
Real leh inhliam
Champions League quarterfinal aṭanga Liverpool petchhuaktu Real hian chak loh chhuanlam an zawng dawn a nih chuan chhuanlam tur a awm - Zidane-a'n hliam, hrem leh Covid-19 vangin first team player chhawr tur 13 chiah a nei!
Midfielder Casemiro leh defender Nacho Fernandez chu hrem vangin an inlan thei lo a, Fede Valverde-a'n Covid-19 a kai a, Ferland Mendy chu hliam vangin a inlan thei lo a, Covid-19 in Raphael Varane a la kiansan lo bawk. Sergio Ramos, Dani Carvajal leh Eden Hazard-te chu hliam inlan thei lo sa an ni a, Karim Benzema leh Toni Kroos te lah Liverpool laka an inkhelh chauh avangin bench-ah dah an ni.
Mahse, Real si ban nghaktu Courtois chuan chhuanlam siam duh loin, "Buainaah hian kan chakna kan chhar chhuak tur a ni a, lunghnur hun a ni lo," a ti a, Zidane chuan, "Kan theihna zawng zawng kan hlan a, draw result neih vangin kan tawp lo ang - a tawp thleng kan bei dawn," tiin a sawi ve bawk.
