Pro-Volleyball khelh hun an sawn

Tualchhung volley-ball inelna lian leh ngaihhlut Pro Volleyball League 2021 chu a hun pangngaiah an khel thei dawn lo. PVL hi May 11 aṭanga khelh tura tih a ni a, mahse tun hnaiah hrileng a hluar leh avangin Mizoram Volleyball Association chuan an hun an sawn.

PVL neih hun tur hi tih chian nghal a la ni lo a, kumin tawp lamah erawh khelh theih an beisei. Club leh player lam PVL atan an inbuatsaih nasa tawh a, inbuatsaihna a thlawn vek loh nan inelna rei lo leh zim zawk MVA Cup chu May 3 aṭangin an khel ang.

MVA chuan thu-chhuah siamin, "Hripui leng karah Pro Volleyball League buatsaih hi - player, club leh official tan a him tawk loah kan ngai, hreh tak chungin kum tawp lama khelh turin a hun kan sawn," an ti.