Mbappe hoin PSG an chak

Season ṭan tlai, hri leng leh result ṭha tawk lo vangin Paris St-Germain an buai a, an tan Ligue 1 title humhim a awlsam lo. Hun harsa karah Kylian Mbappe goal hnih hmangin chu Saint-Etienne 3-2 in an hneh hram.

French champion hian an chunga awm Lille an chesual tih hre sa chungin mikhual an thleng a, goal erawh an nei thei mai lo. Minute 78-naah Denis Bouanga hmangin mikhual team lamin hma an hruai.

Saint-Etienne lawm chhung a rei lo, forward ṭha mi Mbappe hmangin PSG lamin an chhanglet nghal a, France international hian penalty khung lehin hma an hruai let daih; minute 90+2-ah Romain Hamouma hmangin Saint-Etienne lamin an sut leh thung.

Hun a la tawp lo deuh, minute 90+5 a her chhuah meuh chuan substitute Mauro Icardi chuan Angel Di Maria-a cross a tauh lut a, hun tawp hma minute 12 lekah goal nga lutin inkhel boruak nung takah PSG an vannei zawk.

Mauricio Pochettino naute hian point khat chauhin Lille an thlau ta, khelh hmabak panga an la neih avangin league title pawh an humhim leh thei mai tura ngaih a ni.