Juventus tan kawng a harsa zel

Serie A nomawi an hloh dawn a, a sang pali zinga tel pawh Juventus tan thil awlsam a ni dawn ta lo. Old Lady hi an elpui Atalanta lakah 1-0 in an tlawm a, table-ah palina la ni mah se an dinhmun a derthawng.

Pathianni zan Serie A inkhelah Atalanta tan Ruslan Malinovsky chuan hun tawp hma minute li chauh awm tawhah goal awmchhun a khung a, pathumna dinhmun an luah zui nghal bawk.

Hliam vanga inlan lo Cristiano Ronaldo tel lo chuan Juve tlarhma an hriam tawk lo a, season thara Champions League khelhna hmun chu Napoli leh Lazio-te nen an inchuh chho dawn niin a lang.

Inkhel dangah hmahruaitu Inter Milan chu an mikhualna ramah Napoli nen 1-1 in an inhnehtawk a, anmahni hnaih bertu AC Milan chuan an mikhual Genoa 2-1 a hnehin title an beiseina an la chhawm nung ve zel bawk.

Serie A khelh hmabak match sarih an la nei a, pakhatna ni mek Antonio Conte naute hian nomawi chawi turin point 13 chauh an mamawh tawh. An elpui an chesual a nih phei chuan a aia hma pawhin an champion thei dawn.