Thutlukna siam nan a la hma - Silver
NBA commissioner Adam Silver chuan season an hman zel dan tur sawifel nan chuan a la hma deuh niah a ngai a, basketball inelna ngaihhlut ber hi chuti maia tih tawp ngawt chu an tum hmel lo.
Covid-19 vangin NBA season kal lai a chawl lailawk mek a, North America-ah chuan infiamna lian zual zingah hri leng vanga an chawlh hmasak ber a ni hial. Tiam chin awm loa chawl an nih avangin an hma hun tur hi an inrinsiak nasa.
NBA player zingah hri leng kai an awm nual a, an zingah hian Most Valuable Player pawh ni tawh Kevin Durant a tel. Durant hi hliam vanga chawl lai a ni a, inkhel lo pawhin an kai tho avangin an dinhmun tak hi hriatthiam a har.
Silver chuan, "Ka thawhpuite pawh kar hmasa khan ka hrilh tawh, kan awm zel dan tur chungchanga thutlukna siam nan chuan April thla hi chu a hma lutuk. May thleng tal kan nghah pawh a ngai ang," a ti.
NBA regular season-ah hian team tinin match 82 an khel ṭhin a, March thla laihawlah khan chawlh kar nga chauh khelh hmabak nei chungin an chawlh a ngai.
Rahmanna hmasaah chuan regular season a zawh hnu hian conference pahniha team ṭha zual pariat ve ve te chuan April 18 aṭangin playoff an khel leh dawn a, chumi hnuah conference final leh NBA Finals khelh tur a la awm bawk - season hi a la thui angreng hle.
NBA commissioner chuan, "Tun hi thil zawng zawng chinfel hun a ni rih lo, thuawih taka mahni ina awm hun a ni rih. Ni 30 hnuah chuan thutlukna fing leh ṭha zawk a awm beisei ang," tiin a sawi.