Leicester-in FA Cup final an lut

Kum 1969 chu rei tawh tak a ni - he thuziak chhiartu tam zawk chu an la piang kher lo ang. Chutiang ang kum tam liam taah chuan Leicester City-in FA Cup final an khel.

Kum 52-a liam leh meuh chuan Leicester City-in FA Cup final an lut leh ta - Foxes hian Pathianni zan khan FA Cup semifinal-ah Southampton chu 1-0 in an hneh a, final an lut. Foxes tan Kelechi Iheanacho chuan he inkhela goal awmchhun hi a khung a, Saints lamin a chhanletna tur an neih loh avangin Leicester-in final an lut.

Leicester City boss Brendan Rodgers chuan, "Thawnthu thar ziak turin hun kan nei ta," a ti a, nomawi a thlir - FA Cup final hi May 15-ah khelh a ni dawn a, Chelsea leh Foxes-ten champion an inchuh ang.

A hming Iheanacho
Wembley-a inkhelah Foxes chu chak phu zawk an ni a, hming langsar ber chu Iheanacho a ni - Foxes-in FA Cup final an luhna kawnga lawmthu hrilh tur an nei a nih chuan Iheanacho-a ni ang.

Nigerian striker hian tun season-a FA Cup match nga a khelh tawhah goal li a khung - fifth round-a Brighton & Hove Albion an hmachhawn ṭumin goal khat a khung a, quarterfinal-a 3-1 a Manchester United an hneh ṭumin goal hnih a khung bawk.

Semifinal-ah kum 24 mi striker-in Foxes tan goal-a khung leh ta a, he striker hi en liam mai chi a ni ta lo - tun season match 31-a khelhah goal 15 khungin assist vawi nga a nei tawh.

Foxes-in an phu ang ngeiin final an lut a, Rodgers-a hnuaiah he team hian Big Six an elpha tih Premier League-ah an lantir tawh bawk a, English football-ah a vawi khat nan Liverpool boss hian nomawi chawi ngei a tum ang.

Beisei phak lo
Manager Ralph Hasenhuttl enkawlna hnuaiah Saints-in game hmuhnawm an pholang ṭhin a, an game-a rangin player-te an nung ṭhin hle - Foxes lakah erawh hei hi hmuh tur a awm lo.

Tlarhma lamah striker chhuanvawr Danny Ings-a'n eng a ang lo a, ball a hmu ṭha tawk lo bawk. Saints boss Hasenhuttl chuan, "Goal hmaah kan hriam tawk lo. Shot kan nei thei lo a, final luhpui nan a tawk lo a ni," a ti - hei hian Saints khelh dan a hrilhfiah hle.

Wembley-a inkhelah hian thil danglam tak a thleng a, chu chu fans 4,000-in a hmuna inkhel an en kha a ni - March, 2020 hnua England-a a hmuna football inkhel en an tam ber ṭum a ni. Chutihrual chuan tun ṭuma fan-ten inkhel an en hi 'enchhinna' chauh a nih avangin a 'hot' tawk lo a, tualchhung mi leh he inelnaa hnathawktu pawimawhte chauhin an en thei.

Football chu hei hi a ni mai - hriatreng tur sulhnu hnutchhiah hi. Leicester ka zawm tirh aṭang khan he team tana FA Cup pawimawhzia hi hrilh hriat ka ni a, tunah chuan thawnthu thar ziak turin hun ṭha kan nei ta. He hmun ka rawn pan tirh khan chu chu kan tum sa pawh a ni reng a ni. Football thlirna aṭang chuan team dang el phak nih kan duh a, kan el pha reng bawk. Tunah chuan nomawi beisei thei turin kan awm ta. - Brendan Rodgers, Leicester City manager