Bayern Munich an training ta
Hri leng karah Bayern Munich chuan team training an nei ṭan leh ta a, Bundesliga champion lai bakah hian Borussia Monchengladbach leh Wolfsburg te pawhin inbuatsaihna hi an nei ṭan ve bawk.
Thawhṭannia training an neih ṭum hian Bayern player-te hi group hran hranah ṭhen hran an ni a, inhnaih chilh lo leh intawk loin an tlan bakah ball an inpe kual, ni danga training an neih ṭhin dan nen chuan a la inang lo hle.
Germany rama football inelna sang ber hi March 13 aṭang khan an chawl lailawk tawh a, beisei dan chuan April 30 aṭanga khelh chhunzawm leh tur a ni. Mahse, tunlai boruak thlirin an duh ang hunah an ṭan theih a rinawm lo.
Training chu
Bayern Munich training hi a hmuna entu an awm lo a, thlalatu erawh an awm - anni pawh inhlat takin an ding. Warm-up dan pangngaia an taksa an sawi zawi hnuah tlan leh goal shot an chhunzawm a, inhlat deuh taka awmin ball an inpe kual bawk.
German champion player leh staff-te chuan kar hmasa aṭang khan internet kaltlangin ruahhmanna an neih leh an khelh dante an lo zirho tawh ṭhin a, a taka ball an pet nen chuan a boruak chu a danglam hle.
Table hnuai lama awm Paderborn pawh hlawm hrang hranga insiamin training hi an nei. Paderborn coach Steffen Baumgart chuan, "Player-ten an ke ngeia ball an pet leh thei hi a lawmawmin a pawimawh bawk," a ti.
Captain thu leh hla
Bayern Munich captain Manuel Neuer chuan an hun tawn chu mak danglai hlea a hriat thu a sawi. German keeper chuan, "A hlawm te te a inbuatsaihna neih chu a mak, mahse a taka kan ṭhiante kan hmu leh thei ta kha a lawmawm.
"Club thuneitu leh training kan neih leh theih nana hma latu zawng zawng chungah ka lawm, hun harsa tak kara hetiang ruahmanna an nei thei hi a hlu," tiin a sawi a, sorkar thupek an ngaihchan thu a sawi tel bawk.
Bayern hian an manager Hansi Flick chu 2023 thleng daih contract an ziahpui hlim a ni a, tunah hian league lama an elpui Borussia Dortmund aia point lia sang chungin hmahruaitu an ni mek a ni.