Federer ka hneh kha mak ka la ti reng - Del Potro
Juan Martin del Potro-a'n Roger Federer hneha US Open nomawi a chawi aṭangin season 11 a ni der tawh a, Argentine tlangval hian tun thlengin mak a la tih reng thu a sawi chhuak.
Coronavirus vangin tennis season an chawl lailawk a; TV lamah hman lai match ṭhenkhat an ti chhuak nawn nasa, tunlaia an chhuah nawn zingah 2009 US Open final pawh kha a tel a, New York khawpuia inkhel hian mipui hlut a la hlawh reng.
Kum 31 mi Del Potro chuan, "Kum 11 ni tawh mah se replay en ringawt pawh hian ka la hlauthawng reng mai," a ti. Inkhel hmuhnawm bikah hian 3-6, 7-6 (7-5), 4-6, 7-6 (7-4), 6-2 in hnehna a chang a ni.
US Open 2009-ah hian Del Potro hi seeded parukna ni chungin a inlan a, Marin Cilic hneha semifinal a luh hnuah Rafael Nadal a paltlang leh a, nomawi inchuhna inkhelah Federer hneh lehin tennis a khelh chhunga a hun tawn ropui ber a ni hial.