Midang ṭanpui turin Nadal leh Djokovic
Covid-19 vangin Madrid Open khelh theih a ni lo a, inelna buatsaihtu lam chuan tun thla tawp hian Tennis World Tour videogame an buatsaih dawn; world number 1 Novak Djokovic leh Rafael Nadal te an inhmachhawn ang.
Tennis World Tour videogame aṭanga sum hmuhte hi coronavirus kaite ṭanpui nan hman a ni dawn a, inelna hi April 27-30 chhunga neih tur niin tennis khel thiamte chu games hmangin an inel ve thung dawn a ni.
March thla khan La Liga chuan online hmangin FIFA football tournament a lo buatsaih tawh a, Real Madrid aiawha khel Marco Asensio a champion - an games aṭang hian mi ṭanpui nan euro maktaduai khat chuang an thawk chhuak.
Tennis online games-ah hian singles player mipa leh hmeichhia 16 ve ve an tel dawn a, group paliah ṭhen hran an ni ang. Inelna buatsaihtu lam chuan an sum hmuhchhuah hi midang ṭanpuina tur a nih thu an sawi a, player ngaihven hlawh bikte inhmachhawn tir an tum bawk.
Tournament director Feliciano Lopez chuan, "Professional player-te an chenna in chhuahsan si loin an inkhel dawn, kumin Madrid Open kan khelh dan tur chu a makin a danglam takzet.
"Intih hlimna a ni satliah lo a, player inhmachhawn tur hian pawisa an inchawi dawn a, chu chu midang tan a luang chhuak ve leh thung dawn a ni," tiin an sum hmuh dan tur leh a hman leh dan tur a sawi.