Chelsea leh Sarri hma hun a buai

Pathianni zan khan Chelsea chuan an mikhualna ramah 0-2 in Everton an ngam lo a, khawthlang media te chuan Maurizio Sarri-a'n ban a tawk dawn niin an tarlang leh der tawh.

Hetiang boruak karah hian khawthlang media ten Chelsea chanchin an inhriat 'siak' leh tawh a, British sumdawng hausa tawntaw Sir Jim Ratcliffe chuan Blues hi lei a duh niin an tarlang. Ṭhenkhatin Chelsea thuneitute chu Sarri chungchang ngaihtuahin an inhmukhawm niin an tarlang bawk a, rin ber tur hriatthiam a harsa a, tuna chiang rih chu Chelsea hma hun a buai hle tih hi a ni!

Blues neitu Roman Abramovich hian Chelsea hi hralh a duh tak tak a nih chuan Sarri ban mai hi a ngaihtuah rihin a rinawm lo a, Sir Jim Ratcliffe hian Chelsea hi a lei a nih chuan season tawp thleng tal chu Sarri kan hmu dawn tihna a ni nghal.

Mahse, Abramovich hian Chelsea hi a hralh lo a nih chuan Sarri dinhmun a chiang lo sawtah ngaih a ni a, hei tak hian Blues dinhmun hriatthiam a ti harsa hle.

Hralh ta se?
Chelsea lei duhtu anga khawthlang media ten an tarlan hi Sir Jim Ratcliffe a ni a, UK-ah ani aia hausa an awm lo - pound tluklehdingawn 21.05 zet pawisa a nei a, Chelsea leina turah a buai lo ang tih a chiang.

Ineos chemicals group-a chief executive officer ni lai hian Abramovich-a'n Blues hralh a phalna zat pound tluklehdingawn 2.5-in Chelsea hi lei a huam niin an tarlang a, a sum neih zat thlirin lei mai thei dinhmunah a ding. Kum 66 mi sumdawng hausa hi infiamna khawvelah a mikhual hran lo. November 2017 khan Swiss Super League club langsar FC Lausanne-Sport a lo lei tawh a, mahse European football-a club lian lei ngei a duh niin an sawi.

Jim hian sailing team Ineos Team UK a nei bawk a, he team hi kum 2018-a a lei kha niin pound maktaduai 110 ngawt team din nan a seng niin an sawi - Blues hi a lei a nih ngat chuan sum sen a hreh lo ang.

Hralh duh chhan

Abramovich hi club tana sum inseng nasa ber pawl a ni a, a mit it zawng a hlah lo, tia sawi theih tur khawpin a player duh zawngah chuan a che na.

Football a tuipui em em a, a hmunah Chelsea inkhel a en fo a, Blues siam liantu a nih miau avangin Blues fan-te nen an inkar boruak a ṭha em em bawk. Heng zawng zawng ngaihtuah hian Abramovich-a'n Chelsea hralh a duh anga sawi awm hi a mak - khawthlang media te tarlan dan chuan tun hnaia result duhawm an nei thei lo hian Russian sumdawng hausa hi a tibuai.

Hei mai hi a ni lo. Blues hi player lakluh kawngah dan an bawhchhiat avangin January 2020 thleng chu player lalut thei loa hrem an ni a, Abramovich hian hei hi a tuarchhuak peih lo niin an sawi!

Sarri chu?
Chelsea hralh dawn leh dawn loh chungchang boruak inkara buaina pakhat chu Sarri dinhmun hi a ni. Italian manager enkawlna hnuaiah London club-in beisei an phak lo a, table-ah parukna dinhmun an luah mek.

Blues hian season thara Champions League khel tura an beiseina neih pakhat chu Europa League nomawi chawi a ni a, Premier League bikah chuan Tottenham, Arsenal leh Manchester United te nen palina nih an inchuh mek avangin a harsa ang.

Sarri hian ban loh nihna 'chance' pakhat a nei. Blues hian ban ta se 2020 thlenga player thar lalut thei lo tur team hian top coach zingah Blues enkawl duhtu tur an hmu kher ang em, tih hi zawhna awm a ni.

Hemi ngaihtuah chunga Chelsea hian Sarri hi an chelh a nih chuan ama duhthu ngeia a lak player leh player awm sa nen bul an ṭan leh dawn tihna a ni a, team hrechiang satu Sarri ban loh hi thutlukna fing a ni ve thei tho bawk.