Wilder leh Breazeale inhma-chhawn hun tur a chiang ta

World heavyweight champion Deontay Wilder chuan World Boxing Council thupek angin a kawnghren humhim turin ring chhung a rap dawn ta a, May 18 khian New York khawpuiah Dominic Breazeale nen an intawng dawn.

Kum 33 mi Breazeale hian fight vawi 21 a hmachhawn tawhah vawi khat chiah a la tlawm a, kum 2016 khan IBF, WBO leh WBA champion lai Anthony Joshua angam lo.

Wilder chuan, "Heavy-weight-ah chuan kei hi engkim ka ni a, ka hmaa ding tur ngaihtuahna seng tlem tak mai hi awlsam takin ka knockout ang," tiin a ṭawng pawr hle.

American boxer rothap chuan sawi zawmin, " Breazeale hi ṭum dang zawng aia a thawhrim ka beisei a, ring chhungah tuman Deontay Wilder an ngam ngai lo," a ti.

Breazeale chuan Wilder hi chhangletin, "Champion kawnghren hreng chunga a tei kual reng hmuh hi ka kham ta, ring chhunga ka tukdawl hunah chuan hmuhnawm tiin mipui ten an ṭhutna an thawhsan ang," a ti a, Wilder a hlau bik lo.