I League club ten Indian football hma hun an duang

Indian Super Cup-a inlan duh lo I League club pakuate chu Thawhlehni zan khan an inhmu khawm a, Indian football kal zelna tur atan ruahmanna an siam.

I League club pakuate hi Aizawl FC, Chennai City, Chur­chill Brothers, East Bengal, Gokulam Kerala, Minerva Punjab, Mohun Bagan, NERO­CA leh Real Kashmir te an ni. Heng club pakuate hian Indian football hma hun chiang lo reng chu siamrem thuai an duh a, anmahniin Indian football kal zelna tura an duh­dan ruahmanin an siam.

I League club-te hian an ruahmanna hi All India Football Federation lamah a rang thei ang bera thehluh an tum a, AIFF hian eng ang takin nge a chhanlet ang tih chu thil hriat châkawm a ni.

Ruahmanna chu
I League club te hian India ramah top division league pakhat chauh awm se, chu inelnaah chuan tuna I League leh Indian Super Lea­gue club te zawng zawng in­lan vek se tiin ruahmanna an siam.

Ruahmanna ang chuan top division hnuaiah hian league pakhat a awm leh ang a, top division nena chhiarkawpin club 36-in India rama football division sang pahnih hi an khel ang. I League club te hian he an ruahmannaah hian sum chevel dan chu an vei ber zinga pakhat a ni a, club neitu, sum sengtu leh federation ten hlawkna an neih vek dan tur an duang.

Second division club-te pawhin hma an sawn zel theihna turin ruahmanna siam tel vek a ni a, second tier club ho hi club siamṭhatna atana vaibelchhe hnih pek zel turin an ruahman.

Engtin zel?
I League club-te hian rua­hmanna an siam danah chuan tuna Indian Super League-a relegation awm lo ang hi a ni dawn lo a, top division-a a mawng lama awm team te chu division hniam lamah an tla ang.

Hetiang chiah hian second division-a a ti ṭha chinte chu top division khel turin an inhlangkai thei bawk. Hei hian club fotball kal zelnaah kawng awmze nei zawk a sial beisei a ni. Chennai khawpuia club pakua aiawh inhmukhawm hian tun dinhmunah chuan an duhthusam an duang ve a ni ber a, hetiang hian kalpui a ni kher ang em, tih chu zawhna awm a ni.

AIFF hian amah maiin thu­tlukna a siam thei dawn lo tih chiang sa a ni a, relegation awm tel tur hi sum tam tak hloh inhuama Indian Super League khel mek club-te tan pawm a harsa mai thei.

Hello Super Cup
AIFF-in I League club-te a ngaihthah em avang hian club thuneitute an lungawi lo a, I League leh ISL club-te in­hmachhawnna tura ruahman Indian Super Cup-ah club pakuate hi an inhnukdawk.

Mahse, AIFF hnena duh thlen tur an nih miau avangin I League club te hi an inhmuh­khawm hnuah an in phah hniam a, Indian FA hotute hian an harsatna hi chinfel pui an tum dawn a nih chuan Super Cup khelh leh hi an hnial lo. 

I League club te hian Super Cup hi khelh leh a nih dawn chuan qualification round aṭanga khelh ṭan leh an duh thung - Aizawl FC, Gokulam Kerala leh Minerva Punjab te chu qualifier-ah hian an inlan lo tawh a, walkover angin kaltir an ni.

Hei vang hian an inthurual anga match lo khel lo tawh club pathum tan chuan qualification round aṭanga khelh leh phut hi thil awm reng a ni a, AIFF hian engtinnge an chhanlet ang tih chu thil hriat châkawm ber pawl a ni ta.