A thiam pariat zingah Lengpui leh Chanmari West

NECS Cup quarterfinal lut turin nimin khan Lengpui chuan Khatla 1-0 in an hneh hram a, inkhel dangah Chanmari West-in Armed Veng South 2-1 in an hneh ve bawk.

A thiam pariat zingah Lengpui leh Chanmari West an tel a, team dang paruk chu Armed Veng, Chanmari, Chhinga Veng, Ramhlun South, Republic Veng leh Hualngohmun te an ni a. Quarterfinal hi March 22, Zirtawpniah khelh ṭan a ni ang.

Lengpui chakna Zohera
Lengpuiin an player state pawna khel te leh tualchhung player-te an chhawr thei a, Khatla nen an inhmachhawn ṭumin bul an ṭan ṭha hle. Minute lina lekah captain Joe Zoherliana chuan box pawn aṭangin a khung a, Lengpui hian goal dang beisei mah se goal dang hmuh tur a awm lo.

An khingpui Khatla tlarhnung chu Bangalore club Ozone defender Rohmingthanga hoin an ding khawng tlat a, tlarhma lamah captain Jesse Laldinpuia hoin an goal nawr a na a, Shillong Lajong midfielder F. Lalrohlua awm se inkhel result a dang thei hial ang.

Lengpui an talbuai a, veteran player Rohmingthanga chu tlarhnung tikhawng turin dah luh a ni a, ani hi hun tawp hnaih lamah box chhungah Jesse lakah a foul a, Khatla captain a tluk duh loh avangin a him hlauh.

Zirtea la vul reng
Football thiam veng pahnih inkhelah Armed Veng South-in first half-ah Chanmari West lakah inkhel an thunun hret a, chutihrualin hun chanve hma lamah goal hmuh tur a awm lo

Second half-ah Chanmari West fachuam H. Lalnunzira a rawn inlar a, veteran striker hian minute 52-naah Lalthanpuia'n (Tepuia) ding lam aṭanga a cross chu huaisen takin a tlawh lut a, tun hmaa goal khung thei bik player khan goal khung a la thiam reng.

Minute 75-naah Zirtea bawk rawn inlar lehin dinglam aṭanga Lalremmawia (Terema) ball pek chu um lutin a vawi hnih khawihnaah a ke vei lamin goal-ah a khung. Chanmari West hi nuamsa takin an chak dawn emaw tih laiin Terema handball vangin Armed Veng South-in penalty an hmu a, Lalnunsanga'n (Talea) goal-ah chantir mah se goal dang an khung thei tawh lo.

NECS Cup Thlirna Tawi
Last 16
March 16, Inrinni
Ramhlun South 0 - 0 Venghlui
Penalty Shootout-ah Ramhlun South 4-3 in an chak
Kanan 1 - 6 Chhinga Veng
KAN : R. Swapna 33'
CHH : Joel Lamuanpuia 16', 79'; Rochharzela 34', 67'; Isaac Lalremruata 47', 80'
March 18, Thawhṭanni
Chite 0 - 1 Hualngohmun
HUA : Lalnunhlua 36'
Republic Veng 3 - 2 Bawngkawn
REP : Malsawmdawngliana 17', 65'; F.Lalrinpuia 49'
BKN: Lalremruata 27'; H. Lalmuankima 43'
March 19, Nilaini
Chanmari 3 - 1 Hlimen
CHA : Lalnunzama 12', 55', 76'
Bethlehem Vengthlang 0 - 1 Armed Veng
ARM : Lalfakzuala 80'
March 20, Nilaini
Lengpui 1 - 0 Khatla
LEN : Joe Zoherliana 4'
Armed Veng South 1 - 2 Chanmari West
AVS : Lalnunsanga 78'
CHW : H.Lalnunzira 52',75'

Quarterfinal
March 22, Zirtawpni
QF1 Hualngohmun 11:00 AM Republic Veng
QF2 Ramhlun South 1:00 PM Chhinga Veng
March 23, Inrinni
QF3 Lengpui 11:00 AM Chanmari West
QF4 Chanmari 1:00 PM Armed Veng