CYMA Chess-ah Khalta che ṭha

LBS Suzuki 4th Inter Branch YMA Team Chess Championship-ah nimin khan round 4 khelh zawh a ni a, vawiin hian Dawrpui Multipurpose Centre-ah khelh chhunzawm a ni ang.

Nimin khan Khatla-in Mission Veng leh Lunglei Chanmary hnehin match li an khelh tawhah an chak vek a, point riat hmuin hmahruaitu an ni a, champion lai Bethlehem Vengthlang-1 erawh Dinthar nen an inhnehtawk avangin pahnihnaah an tla thla. Vawiin hian BVT leh Khatla te an inkhel dawn a, hei hian champion tur thlengin a hril theih a rinawm.

Inelnaah ṭantirh hian Branch 40 an tel a, nimin lamah Zemabawk leh Chawlhhmun te an inhnuh dawh avangin team tel hi zat hi 38 a ni tawh a. Chess C'ship-ah hian Swiss System 7 Round Robin a khelh tur a ni a, '60 minutes followed by 30 mins + 30 mins with 15 seconds increment' a khelh a ni a, round thum khelh tur a la awm.

Inelna Kalhmang
1. Chak zawk nih dan : Pair khat (team 2) inkhel te hi player pali ve vein board paliah an inkhel a, board hnih ve vea an chak (2-2) hian an inhneh tawk tihna a ni a. Board hniha chak, board khata draw leh board khata chak loh (2½ - 1½) hi chak zawk nih theihna hniam ber a ni a, 3-1, 3½ - ½ leh 4-0 te hian chak theih a ni bawk.
2. Chak hian point 2 an hmu a, chak lo hian point an hmu lo. An inhnehtawk erawh chuan point khat ve ve an hmu.
3. Tlak a awm lo. Knockout system leh round robin kaihkawp swiss system hmanga khelh a ni.