Harden-a'n NBA record siam

Houston Rockets guard James Harden chu NBA history-a an khingpui team 29 laka season khata point 30 tal khung tling vek thei hmasa ber a ni.

NBA MVP nilai Harden hian nimina Atlanta Hawks 121-105 a an hneh ṭumin point 31 a score a, tun season match 67-ah vawi 48 zet point 30 leh a chunglam a khung. Kum 29 mi Harden hian Hawks lakah hian assist vawi 10 leh rebounds pariat a la bawk.

Tun season ṭantirh khan Harden hian point 30 leh a chunglam hi match 32 chhung a zawnin a khung a, nikum December thlaa Hawks an hmachhawn ṭumin a tawp. All time list-ah pahnihna ni pha mah se kum 1960-a Wilt Chamberlain-a'n record a siam tawh vawi 65 a zawna point 30 leh a chunglam a khung chu a pha lo hle.

Hemi kum hian Chamberlain hian NBA team zawng zawng lakah point 30 leh a chunglam khung vek mah se hetihlai hi chuan tun angin team an la tam lo. Kum 2004 khan NBA chuan team tel zat hi 30-ah a tipung a, tun thlengin la hman chhunzawm zel a ni.

Western Conference-ah hian Golden State Warriors chu pakhatnaah an awm a, pahnihna Denver Nuggets nen playoff an tling tawh. Rockets hi pathumnaah awm a, LeBron James-a telna LA Lakers erawh 11-naah awmin playoff khel pha lo thei dinhmunah an ding.

Eastern Conference-ah Mil-waukee Bucks, Toronto Raptors leh Philadelphia 76ers te chu playoff khel turin an tling tawh a. James-a chhuahsan tak Cleveland Cavaliers erawh 14-naah awmin playoff beisei theih a ni tawh lo.