A bul ṭan ṭhat a ngai - Harry Kane

England chuan zanin dar 1:15 hian Euro Qualifier-a an match hmasa ber atan Wembley Stadium-ah Czech Republic an mikhual dawn a, Three Lions captain Harry Kane chuan nikum aia kum ṭha zawk an hman ngei theih nan bul ṭan fuh a pawimawh thu a sawi.

Nikum October thla khan England hian Croatia hnehin Nations League semifinal an lut a, hemi hnua an match pangngai neih leh hmasak ber tur a nih avangin Gareth Southgate-a naute tan boruak thar hipna hun a ni dawn. Thawhṭanni zanah Montenegro an hmachhawn zui leh bawk ang.

Hliam an tam
Czech Republic hmachhawn tura koh zingah Jesse Lingard, Harry Winks leh Joe Gomez te chu inhnukdawk hmasa an ni a, Thawhṭanni khan Fabian Delph, John Stones, Ruben Loftus-Cheek leh Luke Shaw te chu hliam vangin an inhnukdawk leh bawk.

Hnungzâng na vanga inlan thei lo tur Liverpool right back Trent Alexander-Arnold chu inhnukdawk tharlam ber a ni a, coach Southgate chuan Arnold hmunruak luahkhat tur a koh belh tawh lo.

Senior player zingah Borussia Dortmund duhlai Jadon Sancho, Southampton midfielder James Ward Prowse leh Chelsea rawlthar Callum Hudson Odoi te chu an inlan a nih chuan mipui mit la thei tura ngaih an ni.

Nomawi a ngai
World Cup 2018-ah England hian semifinal an lut a, 1966 hnua nomawi lian tham la chawi leh lo ram hian tun hnaiah hma sawn viau mah se an ṭhatna tak lantir tur chuan nomawi chawi an mamawh.

England captain Kane chuan, "England jersey ha chunga nomawi chawi theihna hun hi a thleng zen zen lo. Ka ngaihdanah chuan nomawi kan chawi thei a nih chuan nikum aiin hun kan hmang ṭha a ni ang," tiin a sawi.

June thla hian Nations League-ah Netherlands an hmachhawn dawn a, an chak a nih chuan Portugal leh Switzerland inkhela chak zawk nen nomawi an inchuh ang. Tottenham striker hian kum 28 chhunga World Cup semifinal vawi khat khelh ai chuan Nations League champion hmasa ber nih chu ṭha zawkah a ngai.