Indian Open khel lo tur Saina Nehwal

Saina Nehwal chu a pum lam chiang lo a la dam fel thei lo a, hei vang hian March 26 aṭanga khelh ṭan tur India Open BWF World Tour Super 500-ah a inlan thei dawn lo. Saina a inlan dawn loh avang hian PV Sindhu chu India nula zinga medal la thei tura beiseina a ni ang.

London Olympic bronze medalist Saina hian kum 29 a tling hlim a, a vanglai a liam ve mek. All England Championship-ah pum nuam lo chunga inlanin quarterfinal a thleng thei a, mahse Birmingham aṭanga an haw hnuah a la inkhel leh thei rih lo a ni.

Saina chuan Badminton Association of India (BAI) hnenah Indian Open a khelh theih loh tur thu a sawi tawh. BAI chuan, "All England Championship aṭang khan a dinhmun a la pangngai thei rih lo, ṭha taka inkhel leh thuai thei turin duhsakna kan hlan," an ti.

World number 1 hlui Saina chuan, "Pum na vang bawkin Swiss Open aṭangin ka inhnukdawk tawh a, kan ram khawpui New Delhi-a inelna neih tura ka inlan thei lo tur hi a pawi ka ti. Doctor ten ka ṭhat leh thuai theih nan theihtawpin min enkawl mek a, nakin zela ka ṭhatna tur zawk a nih avangin tun dinhmunah chuan inkhelh rih loh hi a ṭha a ni," tiin a sawi.

Indian Open 2010 leh 2015-ah khan Saina hi a champion a, heimi kum vek hian mipa singles huangah Kidambi Srikanth a champion bawk. 2017 khan PV Sindhu champion ve lehin, anni pathum tih loh hi chu 2008 hnu lamah India rama khawtual player champion thei an awm lo.