Match hmasa berah Azarenka a chak

Victoria Azarenka chuan nimin khan vawi hnih a champion tawhna Miami Open-ah a match hmasa ber a khel a, inkhel hautak hmachhawn nghalin Dominika Cibulkova chu 6-2, 3-6, 6-4 in a hneh hram.

World number 1 hlui Azarenka hi tun hnaiah a result a ṭhat tawk loh avangin seeded a ni phak lo a, chutihrualin a khelh fuh ni chuan player ṭha dang pawh hneh thei turin theihna a nei sang - Cibulkova lakah hian winners vawi 41 ngawt vaw chhuakin ball vaw na bik a la ni reng.

Ruah sur avangin kumin Miami Open khelh ṭan hun hi ni khatin sawn tlai a ni a, match hmasa lamah inkhel entu an la tam lo. Player langsar an la inlan loh bakah khuain a bumro fo avangin mipui 13,800 ṭhut theihna stadium chu a thawl viau.

Mahse, Roger Federer, Novak Djokovic, Serena Williams leh Naomi Osaka te bakah ranking sang chin, hliam leh harsatna dang nei tih loh chu an inlan kim dawn avangin second round aṭang chuan inelna hian ngaihhlut a hlawh zual tura ngaih a ni.