Vawiinah NECS Cup Quarterfinal

NECS Cup quarterfinal chu vawiin aṭangin Lammualah khelh ṭan a ni dawn a, a thiam pariat chiah an dam tawh a ni ringawt lo a, intum tur te hian history an lo neih tawh avangin inkhel hian ngaihven a hlawh ang.

Chawhma dar 11:00-ah Hualngohmun leh Republic Veng te an inkhel dawn. Republic Veng mipui lam chuan an khingpui hi CYMA Football 2017 Last 16-a an hneh loh tih an hre nghal dawn a, phuba an la dawn nge mualpho nawnna a thleng dawn tih erawh inkhelh hunah a hriat ang.

Chhinga Veng pawhin kum hnih liam taa CYMA Football semifinal-a an hneh loh Ramhlun South an hmachhawn dawn. Champion lai chu Ramhlun South an ni a, an khingpui tur Chhinga Veng hi 2017 NECS Cup champion an ni thung.

A hmuhnawm dawn
Republic Vengin Inter Village 2004 leh CYMA Football 2005 an champion hnuah kum 2008 khan CYMA Football-ah final an lut a, hemi hnu hian an reh vang vang. Kum hnih liam ta khan MPL-a striker sulhnu nei ṭha ber zinga mi F. Lalrinpuia hoin beiseina sang tak an nei a, amaherawhchu Huangohmun lakah a thamral a, 3-2 in a chak lo.

Chutihrualin Hualngohmun hi vanneih vanga chak an ni bik lo. An defender Lalhmunmawia, midfielder Lalramtharmawia leh winger Vanlalthanga te chu chak pui tham an ni hrim hrim a, tun ṭumah pawh Hualngohmun trio hi an kim leh ṭhap dawn. An forward Lalnunhlua hming lam rik a ṭul bawk, ani hi Republic Veng lama goal khung tawh a nih bakah tun inelnaa goal thum khung tawh a ni.

Republic Veng pawh naupang chher kawngah hma lain BC Roy Trophy, Khelo India Under 21 leh Dr T Ao champion team-ah an veng rawlthar ten hmun pawimawh an chang a; tawnhriat nei ṭha sa Valpuia bakah K. Lalnunzama (Valtea) leh Paul Ramfangzauva te an kawl avangin chak tura rinkai zawk an ni ang.

Ramhlun South an vannei
Ramhlun South hi champion lai an nih avangin first round-ah an bye a, an vanneih chhan tak erawh vawiina an khingpui tur Chhinga Veng club chuan 2nd Division League-ah vawiin vek hian Trau FC an hmachhawn dawn avangin an player pawimawh Lalromawia leh Vanlalzuidika te an chhawr theih a rinawm loh.

Amaehrawhchu, coach Lalremruata enkawl Chhinga Veng hian midfielder ṭha bik R. Malsawmtluanga leh Aizawl FC winger Rochharzela te an kawl a, Ramhlun South tan nam nul thei an ni lo ang. Coach Danny Lalduhawma enkawl champion lai hian player an nei ṭha a, Malsawmfela te unau ringawt pawh ṭhatpui tham niin Khelo India leh Dr T Aao captain Lalmawizuala leh Lalremruata te an awm bawk avangin champion nawn thei turin an ṭha tawk.