Chhinga Veng hnung zui tur zawnna

2nd Division League group C chuan vawiin tlai dar 2:30 hian match hnuhnung ber an khel dawn a, final round lut tawh Chhinga Veng hnung zui tur an zawng dawn.

Mizo club Chhingcows chuan Trau FC an mikhual dawn a, Manipur club hian hnehna an chang a nih chuan New Barrackpore Rainbow leh Mohammedan Sporting Club beiseina a tawp nghal ang.

Chhinga Veng hi an match hnuhnung berah Jamshedpur nen an inhnehtawk tih loh chu an mualah hnehna an la chang vek a, Trau FC hi khualmualah an hneh tawh bawk. Chhingcows awmna group-ah hian team paruk an awm avangin final round lut turin team pahnih an tling dawn a, group dang pahnih aṭangin erawhin pakhat ve ve chauh quota a awm thung.

Group A-ah final round lut ve thei lo Bengaluru FC Reserves leh FC Goa Reserves te chu table chunglamah an awm a, pathumnaa awm Ahmedabad club ARA FC chu final round lut turin an dinhmun a ṭha. Group B-ah erawh Bangalore club Ozone FC chu hmahruaitu niin match ruk khelh aṭangin point 16 an hmu a, an hnuaia awm Fateh Hyderabad-in point 13 hmuin beiseina an la nei bawk.