Real tana khel châk Pogba

Manchester United-in match hnuhnung pahnihah Arsenal leh Wolverhampton Wanderers an hneh lo a, hetihlai mek hian Real Madrid chuan manager atan France legend Zinedine Zidane an ko kir. Zanin dar 1:15 hian France-in Moldova an tlawh dawn a, an player pawimawh Paul Pogba chuan Real Madrid chu a khelh châkna ber a nih thu a sawi chhuak.

United ṭantu tan chuan Pogba thusawi hi hriam nuam a ni lo a, tun hmain David Beckham leh Cristiano Ronaldo te Real Madrid laka an chan tawh. Inlak ṭhat mamawh Spanish club hian Pogba thusawi hi an ngaihthlak liam mai a rinawm loh.

Kum 26 mi Pogba chuan, "Real Madrid hi khawvel club lian ber zinga mi a ni a, player zawng zawng khelh châkna a ni," tiin a sawi. Juventus player hlui hian World Cup-a France champion ṭuma a khelhpuite chu champion zungbun a pe vek a, America lamah chuan 'champion zungbun' hi an uar hle.

Amaherawhchu, Pogba hian United tan kum 2021 thleng contract a nei a, chhuah duh loh thu ni loin a hlim thu a sawi. French midfielder chuan, "Solskjaer hnuaiah player-te kan hlim a, club a hrechiang a, inrintawkna min neih lettir a, cham hlen turin kan duh," tiin a sawi a, Jose Mourinho nena an boruak ṭha lo erawh thil kal tawh a nih avangin a sawi zui duh lo thung.