India tlangval a chak lo

Miami Masters khelh mekah India tlangval tennis khel thiam Prajnesh Gunneswaran chuan inelna tak a hmachhawn chinah beisei ang result a nei lo. Nimin zing first round inkhelah Prajnesh hi world number 61 Jaume Munar lakah 7-6 (3), 6-4 in a chak lo.

North America-a hard court inelnaah hian world number 84 Prajnesh hian a khingpui service chhuhsak hmasa mah se, Spain tlangval Munar-a'n break point a hmuh hmasak ber hmang ṭangkai ve nghalin tiebreak-ah a chungnung zui bawk.

Set hnuhnung zawkah tawnhriat ngah zawk Munar a chungnung, break point vawi ruk a hmuh zinga vawi hnih lain, a service a hum vek avangin harsa lutuk loin a tlang - India tlangvalin hun pawimawh laia double faults a neih bakah, holam taka a vuak sual ṭhin a tuar.

Kum 29 mi Prajnesh hian kar hmasa khan Indian Wells tournament-ah third round a inhlangkai tawh bawk a, Grand Slam dawt chiaha inelna ngaihhlut Masters 1000 huanga a zawna main draw khelh phak hi atan chanchin ṭha a ni.