Trau FC hmaah Chhinga Veng an tlawm

Second Division League group C aṭangin Chhinga Veng leh Trau FC ten final round an lut - nimin khan Manipur club hian Chhinga Veng hi 3-2 in an hneh a, Mizo club hi tlawm mah se hmahruaitu an nih chian tawh avangin final round an lut tho a, Trau-in an hnung an zui.

Trau-in hnehna an chan miau avangin 4-2 a Jam-shedpur (Reserves) hnehtu Mohammedan Sporting beisei a bo nghal a, nimin inkhelh hmaa beisei nei New Barrackpore chu ATK (Reserves) lakah 1-2 in an tlawm a, Trau hi lo tlawm ta pawh ni se beisei tur an nei lo.

RG Stadium, Mualpuia inkhelah hian Trau tan Netrajit Singh chuan minute riatna lekah goal hmahruai a khung a, minute 58-naah Moirangthem Deepak Singh chuan a chhunzawm ve leh bawk.

Chhinga Vengin Vanlalbiaa Chhangte leh Lalliansanga hmangin minute 60 hnu lamah an si phurh rawn sut mah se final round luh ngei tum Trau an inthlahdul duh lo a, Princewill Olariche Emeka chuan goal khat khung lehin 3-2 in Manipur club an chak.

Second division league hi final round khelh leh tur a ni a, hetah hian group tin aṭanga final round lutte chu intum kualin a sang berin I League an khel ang.

Group A leh B-ah team panga ve ve an awm avangin team pakhat ve vein final round an lut thei. Group A hi April 6-ah match tawp ber an khelh dawn chauh avangin final round lut a la chiang lo.

Group B-ah match khat khelh tur la awm mah se pahnihnaa awm Fateh Hyderabad-in Ozone FC an umphak theih tawh loh avangin Bangalore club Ozone hian final round an lut.