Ronaldo-a'n Ajax hmachhawn dawn

Juventus forward Cristiano Ronaldo chu Atletico Madrid an hneh ṭuma a goal khung lawm dan uchuak tak vangin £17,700 (Rs 15,94,285) chawitir a ni a, inkhel thei lo tura hrem erawh a ni lo.

Italian champion hi Atletico mualah 2-0 a an tlawm ṭumin Diego Simeone-a'n uchuak takin an goal khung a lawm khum a, Juventus stadium-a an inkhelh ṭumin Turin club an tho chhuak.

Allianz Stadium-a hattrick siamtu Ronaldo chuan a goal thumna a khung hnuah Argentine manager chhanlet nan a chet dang phung ang bawkin a tih khum a ni. European football thuneitu sang UEFA chuan Atletico Madrid manager Simeone hi £17,000 (Rs 15,30,999) an lo chawitir tawh.

Juventus hian Champions League quarterfinal-ah chuan Ajax an hmachhawn zui dawn a, first leg hi April 10 hian Amsterdam-ah khelh a ni dawn, he hunah hian Real Madrid forward hlui hi a inlan thei dawn tihna a ni.

Tunah chuan Portugal captain hi ram tan a feh chhuak mek a, 2018 World Cup hnuah ram tana a inlan lehna hmasa ber atan Ukraine leh Serbia a hmachhawn dawn a ni.