Biles tan Olympic hnuhnung ber

World Gymnastics champion Simone Biles chuan a hriselna dinhmun ngaihtuahin Tokyo 2020 chu atana Olympic hnuhnung ber a nih a rin thu a sawi chhuak.

Kum 22 mi Biles hian 2016 Olympics kha a thunun hneh hle a, gymnastics huangah gold pali lain - nikum khan World Championships title pali a la kawp bawk a, gymnast zingah hetiang dinhmun tawng thei hi an la awm ngai lo.

American nula Biles chuan, "Hliam na tak ni lo mah se na neuh neuh ka nei fo a, hei hian infiamna huangah harsatna tam tak min siamsak ṭhin. Tuna ka ngaihtuah dan chuan Tokyo Olympics hi ka tan hun hnuhnung a ni tawh ang.

"A changchuan midang aia tuar nasa bik ni te hian ka inhre ṭhin, sawi chhuak vek lo mah ila harsatna hrang hrang ka tawh hi ka tan chuan a tam tawk," tiin hliam nei fo chunga infiamna hmachhawn reng chu atana thil harsa a nih thu a sawi.

Texas lam chhuak Biles hian World Championship bikah chauh pawh medal 20 a la tawh a, heng zingah 14 chu gold medal a ni. Olympic bikah chuan Romanian hranghlui Ecaterina Szabo (1984) hnuah ṭum khata gold medal pali la thei hmasa ber a ni.