Russia ngamtu Belgium tan Hazard a vul
Euro 2020 qualifier-a an match hmasa berah Belgium-in chak turin harsatna an nei lo a, an mikhual Russia chu 3-1 in an hneh.
Belgium tan goalkeeper Thibaut Courtois chesual mah se Chelsea-a a ṭhian hlui chhan turin Hazard a tling tawk - Real Madrid keeper chetsual vanga goal an chhuah hnuah goal hnih a khung. World Cup semifinalist Belgium hi Pathianni zan dar 1:15-ah an inlan leh dawn a, an hmachhawn tur hi Cyprus an nih avangin hnehna chang ngei tura beisei an ni.
Russia hi Pathianni zanah vek an inlan dawn bawk a, dar 7:30-ah Scotland laka 3-0 a chak Kazakhstan an lenchilh ang - he team hian Scotland an hneh miau avangin zuam sual theih an ni tih a chiang.
Courtois a mualpho
Belgium hi minute 14-na lekah Youri Tielemans hmangin goal hmahruai an khung a, mahse Leicester midfielder duhawm vanga an hlimna hian rei a daih lo hle.
Goal an khung aṭanga minute hnih hnu lawkah goalkeeper chhuanvawr Courtois a chesual a, Real Madrid goalkeeper hi hnung lama Artem Dzyuba-a'n ball a chuhna avangin a chesual a, a ball khalh lai an chhuhsak. Chelsea keeper hlui chetsual avanga ball lo changtu Denis Cheryshev chuan harsatna nei miah loin goal-ah a chantir a, Courtois tih mualphoin a awm.
Chelsea aṭanga Real pantu keeper hi tun hnaia Madrid coach thar Zinedine Zidane chuan a match hmasa berah bench-ah a dah nghal a, international break-a a chet dan hian Real-a a dinhmun a ti derthawng lehzual a nih pawhin a mak lo ang.
Hei le Hazard
Courtois-a'n a chetsual avangin a mualpho lutuk tur thuptu a mamawh a, Belgian keeper mualphona hliahkhuh tura rawn pen chhuak chu Chelsea-a a khelhpui ṭhin Hazard a ni.
Real Madrid nena sawi zawm hlawh reng forward hian minute 45-naah ama penalty hlawhchhuah hmangin a vawi hnih nana an hmahruaina goal a khung a, a la duhtawk mai lo. Hun tawp nan minute hnih chiah a awm tawh tihah Hazard hian a goal thumna a khung leh a, Russia tan thawhlehna hun a awm tawh lo - 3-1 in Belgium an chak.
Russia tan hian hun tawp rualin midfielder chhuanvawr Aleksandr Golovin chu a yellow card pahnihna pek a nih avangin hnawhchhuah a ni a, Cyprus an hmachhawn hunah a inlan thei lo ang.
Scotland an mualpho
Captain Andy Robertson tel loa inlan Scotland-in an beisei loh result an hmu a, an mikhualna ramah Kazakhstan chu ngam loin 3-0 ngawtin an tlawm!
Kazakhstan hi FIFA ranking-ah 117-na an ni mek a, qualifier an khelh match hnuhnung 20-ah vawi khat chiah an chak - mahse hetichung hian Scotland-in an nawr hleithei lo a, an mualpho chiang hle. Astana khawpuia inkhelah hian mualneitu team-in minute 10 chhung lekin goal hnih an khung a, Yuriy Pertsukh leh Yan Vorogovskiy ten an khung.
Scotland-in beisei loh takin minute 10 chhung lekin goal hnih an chhuah a, Scotland-in si phurh an sut theih loh laia Baktiyor Zainutdinov-a'n Kazakhstan tan a rawn khung leh avangin hun tawp hmain chak tur a chiang hman.