Indiana Pacers lakah GSW an vul

Nimin zing NBA regular season inkhelah Golden State Warriors chuan Indiana Pacers 112-89 in an hneh a, GSW player zinga inkhel bul ṭantu panga ten point 10 chuang an score vek a, season kal laia a vawi 49 nan hnehna an chang.

Oracle Arena-a inkhelah Klay Thompson (18 points), Kevin Durant (15), Stephen Curry (15), Andre Iguodala (11) leh Draymond Green (10) ten an thawhhlawk hle a, an match hnuhnung pangaah ṭum li hnehna an chang thei chiah a ni.

Golden State coach Steve Kerr chuan, "Kan theih­na sang bera kan khelh chuan team dang hneh turin kan ṭha tawk a ni. A tlangpui thuin point neih hi chu kan harsat lo, tun ṭuma ka lawmna ber pakhat chu kan basket kan venghim thei em em mai kha a ni," tiin a sawi.

NBA champion lai Warriors hi Western Confe­rence hmahruaitu an ni mek a, Thawhṭanni zing dar 6:00-ah Detroit Pistons nen an inhmachhawn zui leh ang.

Inkhel dangah Denver Nuggets chuan Washington Wizards 113-108 a hnehin a vawi nga nan hnehna an chang zawn ta a, Nuggets tan hian point 15 a score baka assist ṭum 11 neitu Nikola Jokic chu a thawhhlawk hle.