Ramhlun South leh Republic Veng an tlang

Aizawl District FA hnuaia inelna lian leh ngaihhlut ber NECS Cup 2019 quarterfinal chu nimin khan khelh a ni a, champion lai Ramhlun South leh Republic Veng ten semifinal an inhlangkai.

Lammuala inkhel hmasa zawkah Republic Veng hian season hnih liam taa a an ngam loh Hualngohmun chu 3-0 in an hneh, Inter Village 2004 leh CYMA Football 2005 champion tan hian F. Lalrinpuia leh Lalnunzira ten goal an khung a, Lalhmingmawia chuan an mahni lamah a ti lut palh bawk.

NECS Cup champion lai Ramhlun South leh 2017 champion Chhinga Veng an inkhel tawk hle a, extra time khelh a nih hnuah vawi thum champion tawh Ramhlun South hian 2-1 in hnehna an chang.

Chhinga Veng tan Lalbiaknia Royte-in minute 43-naah goal hmahruai khung mah se, minute khat chauh a liam hman tihin Mizoram Police striker Malsawmfela hmangin an chhang let a, Sawmfela hian chakna goal a khung leh bawk.

Nimin Inkhel Results - Quarterfinal
Hualngohmun 0 - 3 Republic Veng
REP : F. Lalrinpuia 13', Lalhmingmawia 61'(OG), Lalnunzira 74'
Ramhlun South 2 - 1 Chhinga Veng
RHS : Malsawmfela 44', 109'
CHV : Lalbiaknia Royte 43'