Mizoram Pachak ber tur a chiang rih lo
Mizoram Powerlifting Association leh Zonet ṭangkawpin a buatsaih Mizoram Pachak zawnna chu nimin khan Zarkawt Recreation Centre-ah neih chhunzawm a ni a, round khat chauh inelna tur awm tawh mah se champion tur a la chiang thei rih lo.
Nimin thlenga inelna neih tawhah champion lai P Lalchamliana leh Ngurthanzauva ten point 176 ve ve an hmu tawh a, inelna chi khat Thingtum inchar tam siak (log press) hmangin an la inel leh dawn. Nimin hian lei aṭanga motor inchawi kan tam siak leh koki a rit pu chunga ṭhutpui a thawhpui leh (squat maximun) hmangin an inel a, Lunglei pachak Chama a che fuh tawk lo, inelna pahnihah hian point sarih ve ve chauh a hmuh avangin table chung lamah a kal fal lutuk thei lo.
Thingsulthliah tlangval Ngurtlanzauva'n point 33 a hmuh belh theih avangin a vawi khat nana champion a beiseina a nung chhunzawm, pathumna dinhmun luah mektu Abraham Lalṭhakima pawhin point 167 a neih tawh avangin champion thei tur zingah a la tel.
A hmuhnawm
Nimina an inelna, lei aṭanga motor inchawi kan tam siakah hian motor hnungah vawn chhan siam a ni a, inchawi kan tam siak a ni. Inelna hmachhawntu kha a kaiza, kawng leh hnungzâng a ngil thlap zel a ngai.
Minute thum zel hun pek an ni a, a chawi tam berin point a hmu sang ber, chawi tam lam inang an awm chuan hun hmang tlem zawk kha a chungnung a ni.
Koki a rit pu chunga ṭhutpuia thawhpui hi a hmuhnawm hle. An rit put tur hi 150kg aṭanga ṭan a ni a, hetiang zat pu zo lo tan point a awm ve thei lo. Inelna hmachawn tur khan a duh zata rit a pu thei a, a pu rit ber chu pakhatna a ni.
Hmabak
March 30, Inrinni zanah a hmawr bawkna neih a ni dawn a, a tawp ni hian inelna pakhat a la awm dawn. Thingtum inchar tam siak (log press) hmangin an inel leh dawn a ni.
He inelnaah hian thingtum (80kg) chhuata awm chu nghawng zawn hma lamah lak kan tur a ni dawn a, lu chungah ban lehlam ve ve a ruala marin char kan tur a ni ang. Lu chunga char kan lai hian kaihza, kiu leh kawng a mar vek tur a ni a, ke pahnih a lei/chhuat rahna hi a che sawn tur a ni lo.
