Liverpool aiin European Super League a langsar

Season thara Champions League khelh tum Liverpool chuan khualmualah Leeds United an hneh zo lo a, 1-1 in an inhnehtawk.

Liverpool tan Sadio Mane chuan minute 31-naah goal hmahruai a khung a, Merseyside club hian hei hi an chakpui mai dawn nia a lan hnuah Diego Llorente chuan minute 87-naah an si phurh sutin Leeds tan point hlu tak a hlawh chhuak. Ṭum dang ang chu ni se top four-a awm tura dinhmun chhe tak Liverpool chak zawh loh thu hi titi luahtu tur a ni a, mahse, chu ai chuan European Super League a langsar zawk.

Liverpool hi ESL dintu club 12 zinga mi an ni a, he league hi an khel tak tak dawn a nih chuan Reds tan tun season Premier League-a an tawpna hian ṭangkaina a nei lo thei.

A boruak
Ṭum dang ang chu nise Liverpool-in thlir rawn an hlawh ang a, Leeds laka an result-in European football-a an dinhmun a nghawng theih dan tur thlengin media titi tui ber a ni ang.

Mahse, tun ṭum Elland Road-a Liverpool zin erawh an inkhel aiin ESL-in ngaihven a hlawh zawk a, inkhelh hmaa Klopp an kawmnaah pawh inkhel tur aiin ESL an zawt nasa zawk! Elland Road chhehvelah ESL duh lohna lantirin fans an pungkhawm a, ṭhenkhatin Liverpool jersey an hal a, stadium chungah thlawhtheihnain, "Super League thlawp suh," tih inziahna banner-a thlawh kualpui bawk.

Stadium chhung lamah Leeds player-ten Champions League logo bula, "Hlawh chhuak rawh u," tih leh "Football hi fan-te tan a ni," tih chuanna t-shirt an ha bawk a, top four beiseia Liverpool inkhel tur aiin ESL-a langsar zawk.

Tichuan....
ESL sawiselna boruak karah Liverpool an inkhel a, Reds player-ten inkhel chiah an ngaihtuah tih lantirin game an thunun hneh hle - minute 31-naah Trent Alexander-Arnold chuan Mane tan a siamsak a, January hnua a vawi khat nan Senegalese forward hian Premier League-ah goal-a khung - league match 10 zet hnua a goal hmasa ber a ni!

Reds tan first half-ah Thiago Alcantara leh Roberto Firmino-ten an chance neih an chhawr thei lo a, chawlhlawk hman hnua khel ṭha Leeds tan Patrick Bamford chuan crossbar a tih per thung.

Liverpool tan bench aṭanga luhtir Mohamed Salah chuan 2-0 a a team hmahruaipuina remchang nei mah se a chhawr thei lo a, hun tawp nan minute thum chauh a awm tawh tihah Llorente chuan si phurh a rawn sut - English football-a a goal hmasa ber a ni.

Merseyside club tan Alex Oxlade-Chamberlain-a'n a team tan point thum hlawhchhuah theihna remchang nei mah se Leeds keeper Illan Meslier-a paltlang thei lo a, 1-1 in inkhel a tawp.