ESL dotu Jurgen Klopp

Liverpool-in hnehna an chan zawh loh avangin table-ah parukna an ni mek a, match ruk chiah khelh tur a awm tawh avangin Premier League champion hian season tharah Champions League an khel lo a nih pawhin a mak lo ang.

Chutihrual chuan ESL din a nih dawn miau avangin Liverpool tan top four zinga tel hi awmze awm lo a ni ve thei tho bawk a, tun dinhmunah chuan top four an khelh dawn leh dawn loh aiin ESL chungchanga Jurgen Klopp-a ngaihdanin ngaihven a hlawh zawk!

Liverpool boss Klopp chuan, "ESL vanga ban mai duh tur ang hiala min sawi thawm ka hria a, kan hun tawn a harsat zawh poh leh ka cham dawn tihah ka chiang thung," a ti a, ESL vanga ban a tum lo hle.

German coach hian kum 2019 khan Super League neih loh a duh thu a lo sawi tawh a, a dinna ngaiah a ding reng. Coach thawm nei lian ber pawl Klopp chuan ESL vanga a team-in dem a hlawh erawh a hriatthiam loh thu a sawi tel thung.

Liverpool din thar lehtu Klopp chuan, "He thutluknaah hian keini chu kan tel ve lo. Keini chu team kan ni a, inchhuang tak chungin he jersey hi kan ha ṭhin. Football khawvela club neitute leh mi ṭhenkhatin thutlukna an siam a, keini chuan a chhan kan hre ve lo," a ti.

Leeds chuan Liverpool dressing room-ah an t-shirt hak ang an lo hnutchhiah a, hei hian Klopp-a ti lawm lo hle. Borussia Dortmund boss hlui chuan, "He hmunah hian club hmel lanna ber ni chungin kan lo kal a, Leeds fans thlengin thutlukna siamtu kan ni ta emaw tih mai turin min lo au el a, mahse, chutiang a ni si lo," a ti a, a lawm lo hle.