Klopp vs Gary Neville

European Super League din a ni dawn tih a hriat rualin Gary Neville-a'n na takin a sawisel nghal a, Manchester United legend hian a club hlui leh Liverpool lakah ṭawngkam a duhtui lo lehzual.

Football khawvela pundit hlawhtling ber pawl ni zui hian Reds phei chu an hlapui, "You'll never walk alone," hmangin a bei a, hei hi Klopp chuan a hrethiam lo.

Kum 53 mi coach chuan, "Gary Neville khan 'You'll Never Walk Alone' chungchang a sawi a, khatiang kha chu a thleng tur a ni lo. Kan hlapui a ni a, he hla sa tur hian zalenna kan nei. A hriatthiam loh hla a lo sawi hi a ṭulna a awm lo a, a fair lo a ni.

"Keipawhin he Super League hi ka duh lo a, mahse, club dang chungchang ka sawi kher lo," a ti a, United legend a dim lo hle.

Klopp hian a la duhtawk lo. German coach chuan, "Gary Neville hi sum tamna ringawt ni loin, hmun pawimawhah thutlukna siam turin awm se ka ti ngawt mai. Sum tamna Manchester United tan a khel ṭhin a, tunah sum tamna 'Sky' lamah bawk a ṭhu leh a ni.

"ESL chungchangah hian coach leh player-te hi kan tel lo tih hria ula ka duh a ni. In dinhmun angah tho kan ding a, nimin lawkah ESL chungchang kan hria a, vawiinah kan inkhelh leh a ngai tho. Hemi chungchangte hi Neville chuan a ziak em? A dik thei lo a ni," a ti!

Mahse, Neville chuan, "Liverpool hi ka sawichhe hnem tawk tawh a, ESL chungchangah erawh anmahni ka hmuhsitna ṭawngkam a ni lo. Engvangin nge ka thusawi khan Klopp-a tihbuai em em ka hrethiam pha lo a, ka thusawi kha chu kan rama football humhim nana sawi mai ka ni.

"United leh Liverpool hian ka bei an tidawng ber a, an pahnih hian darkar 24 liam ta chhung khan na takin ka sawisel ve ve a ni," a ti a, Klopp chuan a thusawi a la kawiah a ngai.

Hetihlai hian England legend Alan Shearer chuan Klopp chu fakin, "Amah chhawrtute duhdan leh a ngaihdan a inang lo a, huaisen takin a ṭawngchhuak a nih kha. Heng club neitute hi khawiah nge an awm? Midang lenluh theih lohna dawr hawn an chak em em chhan chu min hrilh thei lo em ni?" a ti a, ESL-a thlawp bik lo.