Mahuma Memorial an chawl dawn

Cricket Association of Mizoram (CAM) hnuaia inelna lian, Mahuma Memorial 1st Division Screening Tournament chu hrileng vangin chawlh lailawk a ni dawn. Nimina inkhel tura ruahman tawh pawh inkharkhip vang khelh theih a ni lo.

CAM hnuaia team ṭha 10 inelna hi Suaka Cricket Ground, Sihhmuiah khelh a ni a, team inlan zawng an inkhelh kual hnuah a sang pahnihin final an khel dawn - a hniam lam pali erawh second division-ah an tlahniam ang.

Thuchhuah siamin CAM chuan, "Cricket Association of Mizoram hnuaia inelna te chu sorkar inkaihhruaina angin April 20-24 chhung chu khelh a ni dawn lo. Hei hian tournament bakah academy kalpui pawh a huam ang.

"Sorkar thuchhuak ngaihchan a ni anga, inkaihruaina tharah infiamna kalpui theih a nih chuan tournament hi khelh chhunzawm leh a ni ang," an ti. Tournament kal lai chu khelh zawh ngei an tum.

Season hmasa khan hrileng vangin inelna a awm mumal thei lo. 1st division a team pariat awm ṭhin pawh 10 an awm phah, kuminah hian pali an tlak a ngaih phah dawn - season tharah chuan kalphung pangngai angin team pariat an awm leh tawh ang.