Jeremy tan Olympic qualifier a zo

Tokyo Olympic khel turin Jeremy Lalrinnunga dinhmun a ṭha tawh a, tunah chuan 'official' taka puan chiah hmabak a ni ta. Mizo rawlthar hian qualifying tournament a khelh tur ang zawng zawng chu a khel zo tawh.

Asian Senior Weight-lifting Championship 2021 neih mek a ni a; Tashkent, Uzbekistan-a inelna neihah Thawhṭan zan khan Jeremy hi inlanin 67kg huangah pariatna dinhmun a luah.

Youth Olympic gold medalist Jeremy hian qualifier hnuhnung ber hi duhthusamin a hmang ṭha tawk lo. Mahse, inelna neih tawh hmasa lamah a chet ṭhat avangin India aiawh zingah a tel thei dawn a, infiamna khawmpui lian berah erawh hmabak a hautak dawn hle.

Jeremy hian 2018 khan Argentina khawpuiah India tan 62kg huangah Youth Olympic gold medal a lo la tawh. Theihna a neih san avangin Indian Weightlifting Federation chuan Tokyo Olympic atan a chher a, a kum la tlem deuh mah se nakin hun atan a chher mek.

Tokyo Olympic hi Jeremy tan chuan hna hautak a la ni dawn, kum 18 mi chauh a la nih bakah a khelhna weight category hi tihsansak a ni a, heti chung hian Indian lifter zingah chuan a ti ṭha berte zinga mi a ni.