Atchilh ka nei ngai lo - Djokovic

Novak Djokovic chuan nomawi chawi duh viau mah se a nunah engmah atchilh a neih ngai loh thu a sawi. Hmanni deuh khan Rafael Nadal-a'n Serbian star hi title lak duh leh atchilh tiin a lo sawi tawh a ni.

Monte Carlo Masters khelh zawh takah Nadal leh Djokovic an inlan a, player ropui pahnih hian semifinal pawh an lut phak lo. A chak loh hnuah Nadal hian, "Tennis hi ka hmangaih a, nuamti taka inkhelh hi ka duh ber.

"Kei chuan nomawi ringawt ka ngaihtuah lem lo," a ti. Zawhna a chhan zelnaah Spanish player hian a elpui Djokovic chu champion ringawt ngaihtuah ni awmin a sawi tel bawk a ni.

Grand Slam lak hnem lamah Roger Federer leh Nadal (20 titles) an chungnung ber, anmahni hnaihtu chu vawi 18 champion tawh Djokovic a ni thung - tennis an chawlh hunah tuin nge major title kawl hnem ber ang tih chu mi hriat chak a ni.

Player pathum hi na takin an inel a, mimal chuan an in haw lem lo. A bik takin Federer leh Nadal chu ṭhian inkawm ngeih pangngai tak an ni. Mahse, player inel an nih miau avangin media lamin an elpuite chanchin hi an zawm fo thung.

World number 1 Djokovic chuan, "Nadal hi ka elpui hautak leh lian ber a ni a, player dang zawng zawng ai pawhin ka zah zawk. Mahse, a ngaihdan an zawhna a chhanna erawh kha chu ka pawmpui lem lo.

"Tournament pakhata ka chak loh avangin ka thinrim vak ngai kher lo, amaherawhchu inelna ka hmahchawn a nih chuan chak ngei ngei tumin ka bei ṭhin," tiin a sawi thung.

Novak hian a chet fuh loh ṭumin racquet vuak chhiat leh court sir lama chanchin ngaihnawm lo a lo nei fo tawh a ni.