Inkhel turin Halep a inpeih

Simona Halep chuan a dar (shoulder) hliam a dam thu a sawi a, clay court season hmang turin a inpeih tawh. Romanian star hi Miami Open-ah khan hliam vangin a lo inhnukdawk tawh a ni.

World number 3 Halep chuan, "Hliam neih hi chu a hrehawm ṭhin takzet. Dam ver vawr chunga tournament khelh aia nuam hi a awm leh thei tawh chuang lo, kuminah pawh hian a tam thei ang ber nomawi chawi theih ka duh.

"Hliam ka neih hma khan ka khel tluang ṭha em em a, tunah erawh hliam damkawr ka nih avangin a awlsam dawn lo. Chutih rualin clay court season a ni ṭan chiah a, ka tan chuan inkhelh nawmna hmun a ni," a ti.

Nikuma hrileng vanga inkharkhip a nih hma khan Halep hian a zawnin match 13 hnehna a chang a, nomawi pahnih a chawi bawk. Kuminah hian hliam nei tawh loin a khel tluang a nih chuan player langsar a nih chhunzawm a rinawm.

Halep hian May thla a khelh tur French Open inbuatsaih nan Madrid Masters leh Rome Open khelh a tum.