India Open khelh hun an sawn

Badminton Asso-ciation of India (BAI) chuan hrileng karah Indian Open kaltlangpui ngei an tum a, mahse a hun pangngaiah khelh theih a ni dawn lo - tournament khelh hun tur erawh tih chian theih a la ni lo thung.

Tun thlatir khan Bad-minton World Federation (BWF) chuan Indian Open hi a hmuna entu awm loin khelh theih a nih tur thu a pawmpui. May 11-16 chhung hian Delhi khawpuiah khawvel badminton player ṭha an fuan khawm tura ngaih a ni.

Mahse, Delhi chief minister Arvind Kejriwal chuan India ram khawpuiah hian inkharkhip a puang a, hei vang hian infiamna leh punkhawmna lian tham chu huaihawt theih a ni rih dawn lo.

BAI general secretary Ajay Singhania chuan, "Loh theih lohna avangin tournament khelh hun sawn a ngai, keini lam chuan duhthlan tur dang kan nei lo. Inelna leh leh hun tur hi BAI, Delhi sorkar leh kan thawhpui dangte nen ka la sawiho leh ang.

"Player inlan tum 228 an awm a, coach nen a tlem berah mi 300 chuang chu kan ni dawn. Tunah chuan Yonex-Sunrise India Open hi kan nei thei ngei ang em tih a chiang ta lo, neih ngei erawh kan duhthusam a ni," tiin a sawi.

Season hmasa khan hrileng vangin badminton inelna hi a awm mumal lo. Kuminah hian tournament ṭhenkhat chu khelh luih hram a ni, nipui laia neih tur Tokyo Olympic atana qualifying tournament a nih nghal a vangin player lamin an ngaihlu ṭhin hle.